படிக்க வேண்டிய நூல்கள்!

1. காரல் மார்க்சு எழுதிய ‘‘மூலதனம்'' நூல் தொகுப்பு - தமிழில் க.ரா.ஜமதக்னி 

அறிஞர் காரல் மார்க்ஸின்  கருத்துகள் காலத்தை வென்று நிற்கின்றன. மானுட இயல், வரலாற்று இயல், பொருளாதார இயல், சமூக இயல், அரசியல் ஆகிய தளங்களில் நின்று மூலதனம் செய்யும் கூற்றுகளை இங்கிலாந்து நாட்டில் வெளியிடப்பட்ட பல ஆய்வறிக்கைகள், தரவுகள் அடிப்படையில் ஆய்வு செய்து எழுதப்பட்ட நூல். சான்றாக, இன்றைய இந்தியாவில் மத அடிப்படையில் இந்த உணவை உட்கொள்ளக் கூடாது, உணவை உட்கொண்டால் வன்முறையில் ஈடுபடுவோம் எனக் கூறுகின்ற காலக்கட்டத்தில் மார்க்சின் துல்லிய பார்வைக்கு ஒரே ஒரு சான்று.

மூலதனம் நூலின் இரண்டாம் தொகுப்பில்

‘‘விவசாயிகள் பட்டினியால் வாடும் போது,

அவனுடைய மாடுகள் நன்றாக வாழ்கின்றன.

நாட்டில் மழை மீண்டும் மீண்டும் பெய்தது.

கால்நடைகளின் உணவு பெருமளவில் இருந்தது.

கொழுத்த மாடுகள் ஒரு புறமிருக்க,

இந்து விவசாயி பசியால் இறந்து போவான்.

உழைக்கும் கால்நடைகள் பாதுகாப்புடன் உள்ளன.

அவை விவசாயத்திற்கு வலிமையையும்

எதிர் கால வாழ்க்கை மற்றும் வருமானத்திற்கு

ஆதாரங்களையும் பெற்றுத் தருகிறது.

இத்தகைய சூழலில், தனிமனிதனுக்கு

மதம் வழங்கும் அறிவுரை கொடுமையானது.

சமுதாயத்தைப் பிற்போக்குத்தனமாக மாற்றுகிறது.

இந்தியாவில் ஒரு மாட்டைவிட மனிதனைச்

சாகடிப்பது எளிது.இதைச் சொல்வதற்கே கொடுமையானது என்றாலும் சொல்லியாக வேண்டும் எனக் குறிப்பிட்டார்.

((While the peasant farmer starves, his cattle thrive. Repeated showers had fallen in the country, and the forage was abundant. The Hindoo peasant will perish by hunger besides a fat bullock. The prescriptions of superstition, which appear cruel to the individual, are conservative for the community; and the preser vation of the labouring cattle secures the power of cultivation, and the sources of future life and wealth. It may sound harsh and sad to say so, but in India it is more easy to replace a man than an OX. -Das Capital valume 2, - Chapter X11, Page 142)

2. இனிவரும் உலகம் - பெரியார்

1943இல் திருமண நிகழ்வில் ஆற்றிய உரை.  மணவிழாவில் பெரியாரோடு கலந்து கொண்ட அறிஞர் அண்ணா குறிப்பெடுத்து உரைக்கு நூல் வடிவம் கொடுத்தார். 1944 லிருந்து 2018 வரை 27 பதிப்புகளைக் கண்டு வருகிறது இந்நூல். சமுதாயம், அரசியல், அறிவியல் என அனைத்துத் துறைகளையும்  இந்நூல் அலசுகிறது.

‘‘கம்பியில்லாத் தந்தி சாசனம் ஒவ்வொருவர் சட்டைப் பையிலும் இருக்கும்.''- கைப்பேசி இல்லாத மனிதர்களை இன்று காண்பது அரிதாக உள்ளதல்லவா!

 ‘ஆளுக்கு ஆள் உருவம் காட்டிப் பேசிக் கொள்ளத்தக்க சவுகரியம் ஏற்படும்‘

‘மேற்கண்ட சாதனங்களால் ஒரு இடத்திலிருந்து கொண்டே பல இடங்களில் உள்ள மக்களுக்குக் கல்வி கற்றுக் கொடுக்கக்கூடிய சாத்தியப்படும்‘

2019 கொரானா நோய்த் தொற்றுக்குப்பிறகு பள்ளிப்பாடம்  தொடங்கி பிரதமர் உரை வரை எல்லாம் இணையத்தின் வழியாகத்தானே காண முடிகிறது.

எத்தகைய தொலைநோக்குப் பார்வை! பாலியல் தொழிலைக் களைவது உட்பட அன்றாட வாழ்வில் மனிதர்கள் சந்திக்கும் சமூக சார்ந்த

பிரச்சினைகளுக்குத் தீர்வு சொல்லும் நூல்.

3.  அறிஞர் அம்பேத்கர்

அறிஞர் அம்பேத்கரின் முதல் தொகுப்பு நூல் 12 உரைகள், கட்டுரைகள்  அடங்கிய மிகச்சிறந்த நூலாகும். அரசியல், சமுதாயம், தத்துவம், கூட்டாட்சி இயல், மொழிவாரி மாநிலங்கள் ஆகிய அனைத்து கருத்துகளும் இன்றைய இந்தியாவின் சீரமைப்பிற்குப் பயன்படக்கூடியது. சாதியை அழித்தொழிக்க வேண்டும் எனும் கட்டுரை மிக ஆழமான ஆய்வு.

‘‘இந்து அறத்தின் மீது சாதியின் தாக்கம் மோசமானது. சாதி பொது உணர்வைத் தகர்த்து விடுகிறது. சாதி பொதுவான கொடை பண்பை அழித்துவிடுகிறது. பொதுக் கருத்து என்பதைச் சாதியில் காண முடியாது. ஒரு இந்துவின் பொது உணர்வு என்பது அவனின் சாதியே. அவனின் பொறுப்புணர்வும் அவனின்

சாதிக்கு மட்டுமே உட்பட்டது. அவனின் சார்பு நிலையும் சாதியோடு கட்டுப்படுத்தப்படுகிறது. நற்பண்பும் சாதியைச் சார்ந்தது. ஒழுக்கமும்

சாதியோடு பிணைந்தது. நலிந்தவர்களுக்கு இரக்கம் காட்டுவதில்லை. தகுதியானவர் போற்றப்படுவதில்லை. தேவையானவர்களுக்கு  உதவி கிடைப்பதில்லை. துயரப்படுபவர்களுக்கு  உதவ முன் வருவதில்லை. உதவும் பண்பு சாதியில் தொடங்கி சாதியில் முடிவடைகிறது. மற்ற

 சாதியினருக்கு இரங்கும் பண்பு இல்லை....

(பக்கம் 50)

இக்கட்டுரையின் இறுதி வரிகள்: இந்து சமூகம்

சாதியற்ற சமூகமாக எப்போது மாறுகிறதோ அன்று தான் தன்னைப் பாதுகாத்துக் கொள்கிற வலிமை பெறும் என்ற நம்பிக்கையை அது பெறும் என நான் தெரிவித்துக் கொள்கிறேன். அத்தகைய உள் வலிமை இல்லாமல், இந்து சுயராஜ்யம் என்பது அடிமைத்தனத்திற்கு முதல் படியாகிவிடும் என்பது எனது கருத்தாகும்.

இந்நூலில் ‘மொழிவாரி மாநிலங்கள் சிந்தனைகள்& என்ற கட்டுரையில், ஒன்றிய அரசில் குவியும் அதிகாரப் போக்கினால் ஏற்படப் போகும் எதிர்கால விளைவுகளுக்கு அண்ணல் அம்பேத்கர் எச்சரிக்கை தந்துள்ளார்.

அறிஞர் அம்பேத்கர், மொழிவாரி மாநிலங்கள் அமைக்கப்பட்ட போது, ‘‘வடக்கிற்கும் தெற்கிற்கும் பெருமளவிலான வேறுபாடுகள் உள்ளன. வடக்குப் பிற்போக்கானது, தெற்கு முற்போக்கானது. வடக்கு மூடநம்பிக்கையில் உள்ளது. தெற்கு பகுத்தறிவைப் போற்றக்கூடியது. தெற்கு கல்வியில் முன்னிலையில் உள்ளது, வடக்குக் கல்வியில் பின்தங்கியுள்ளது.  தெற்கின் பண்பாடு புதுமை நிறைந்தது, வடக்கின் பண்பாடு பழமையில் உள்ளது. நான் ராஜகோபாலாச்சாரியை வரைவுச் சட்டத்தின் தலைவர் என்ற முறையில் சந்தித்தேன். அரசமைப்புச் சட்டம் உருவாகும் நிலையில்& ‘‘நீங்கள் பெரும் தவறைச் செய்கிறீர்கள். எல்லாப் பகுதிகளுக்கும் சம அளவில் பிரதிநிதித்துவம் அளிக்கும் ஒரு கூட்டாட்சி அமைப்பு இங்குப் பொருந்தாது'' என்று அவர் குறிப்பிட்டார். ‘‘அப்படிப்பட்ட கூட்டாட்சி அமைப்பில் பிரதமரும், குடியரசுத் தலைவரும் இந்தி பேசும் பகுதிகளிலிருந்துதான் வருவார்கள்.... இரண்டு கூட்டரசுகள் இருக்க வேண்டும். ஒன்று வடக்குக் கூட்டரசு, மற்றொன்று தெற்குக் கூட்டரசு. இந்தியப் பெரும் கூட்டமைப்பு அரசு சமமான அளவில் மூன்று துறைகளில் (சட்டமன்றம், நீதி, நிர்வாகம்) சட்டம் இயற்றும் அதிகாரத்தைப் பெற்றிருக்க வேண்டும்.‘‘ இவைகள்தான் ராஜகோபாலாச்சாரியாரின் உண்மைச் சிந்தனையாக இருந்தன. இந்தக் கருத்தியல் உண்மையான காங்கிரசுகாரரின் ஆழ்மனதின் வெளிப்பாடாகும். ராஜகோபாலாச்சாரியை ஒரு தொலைநோக்குப் பார்வை கொண்டவர் என்று நான் மதிக்கிறேன்''.

 ‘‘வடக்கு, தெற்கு என இந்தியா பிரிந்து போகலாம் என்கிற  அவரின் கருத்து வெற்றி பெறக்கூடாது என்பதற்காக நாம் ஒவ்வொருவரும் பணியாற்றிட வேண்டும். அமெரிக்காவில் வடக்கிற்கும், தெற்கிற்கும் நடந்த உள்நாட்டுச்

 சண்டையை மறக்கக் கூடாது. இந்தியாவில் வடக்கிற்கும், தெற்கிற்கும் உள்நாட்டுச்

சண்டைகூட ஏற்படலாம். பெருமளவில் பண்பாட்டு வேறுபாடுகள் வடக்கிற்கும், தெற்கிற்கும் இருப்பதை மறந்துவிடக் கூடாது. இந்த வேறுபாடுகள் தீப்பற்றும் நிலையை ஒத்தவை''.

4.  அறிஞர் அண்ணா

தமிழனை உயர்த்திய தலைமகன் உரைகள்& தொகுப்பு : கோ.வேள்நம்பி, சீதை  பதிப்பகம்.

அறிஞர் அண்ணாவைத் தவிர்த்துவிட்டுத் தமிழ்நாட்டின் அரசியலை நகர்த்த முடியாது. பல பதிப்புகள் வெளியிடும் அவரது நூல்கள் அதிக விற்பனையைக் காண்கின்றன.

1932 ஆம் ஆண்டிலிருந்து 14 உரைகள் இந்நூலில் தொகுக்கப்பட்டுள்ளன. நாட்டிற்குத் தேவையான முதன்மையான கருத்து முத்துகள் எனலாம்.

‘‘தொழிலாளியின் உழைப்பினால் பாலும் தேனும் பெருகி ஓடுகிறது. சீமாட்டிகள் நவீன இரவு விடுதிகளில் ஆடி, உரையாடி மகிழ்கின்றனர். ஆனால் தொழிலாளி, தனது குடிலில் பட்டினியால் வாடும் அவன் குழந்தைகளுக்கும், எலும்பும் தோலுமாக இருக்கும் மனைவிக்கும் நடக்கும் துயரமான உரையாடலைத் தான் காண்கிறான். இத்தகைய கடுமையான முதலாளித்துவம் தான், சமதருமத்தின் பிறப்பிற்கு காரணம்.'' இக்கட்டுரையை 1932 ஆம் ஆண்டு மாணவராக ஆங்கிலத்தில் எழுதி பரிசுப் பெற்றார். கட்டுரை தமிழ் மொழி பெயர்ப்பும் தரப்பட்டுள்ளது.

நாடாளுமன்ற மேலவையில் 4.3.1965இல் அறிஞர் அண்ணா ஆற்றிய உரையின் தமிழாக்கத்தில்

‘இந்தியாவின் ஒற்றுமைக்காக  ஒரு பொது மொழி தேவை' என்று  சுலபமாக  வாதிடலாம்.  இந்த வாதத்தைக் கவனித்துப் பார்ப்பதற்குமுன், ‘ஒற்றுமை'  என்பதற்கும் ‘ஒருமைப்பாடு' என்பதற்குமுள்ள  வேறுபாட்டை  இந்தப் பேரவையின் கவனத்திற்குக் கொண்டு வர விரும்புகிறேன்.

பொதுமொழி ஒன்றின் மூலம்  இந்தியா ழுமுவதையும் ஒன்றுபடுத்த நீங்கள் விரும்புகிறீர்கள், அல்லது  ஒரே விதமாக்க முயலுகிறீர்கள். இதில் தெளிவு வேண்டும். இந்தியா முழுவதையும் ஒரு மட்டமாக்கிவிடுவதுதான் உங்கள் முயற்சி என்றால்,  இப்பொழுதே கூறுகிறேன் & இந்த முயற்சியில்

 நீங்கள்  துளிகூட வெற்றி பெறப் போவதில்லை!

எது நேரிடினும் சரி&காலஞ் சென்ற  தலைமையமைச்சர் (நேரு) கூறியதுபோல - இந்தியாவில் பலதரப்பட்ட  இன&கலாச்சார&மொழிப் பிரிவுகள் இருக்கின்றன.  இத்தகைய பலதரப்பட்ட தன்மைகளை  ஒத்துக் கொண்டு&மதிப்பளித்து, ஓர் ஒற்றுமையை உண்டாக்க வேண்டுமேயன்றி,  ஒற்றுமையென்றால் ஒரேவிதமாக இருக்க வேண்டுமென்று தவறாக நினைத்து, வேறுபாடுகளையெல்லாம் அளிக்க முற்படக்கூடாது!

‘‘ஒருநாட்டில் ஒற்றுமை உண்டாக்க, மொழி ஒன்றுதான் அடிப்படையா?' என்று யோசித்துப் பார்க்க வேண்டும். ஒற்றுமை உண்டாவதற்கு மொழி ஒன்றுதான் தடையாக இருக்கிறதா? & நிச்சயமாக இல்லை!

வட்டாரங்களுக்கிடையே  பொருளாதார ஏற்றத் தாழ்வுகள் இருக்கின்றன! தனிப்பட்ட முறையில், வட்டாரப் பற்று&மொழிப் பற்று ஆகியவை  இருக்கின்றன! இவையெல்லாம நீக்கப்பட்டால்தான் ஒருவித ஒற்றுமை எண்ணம் உருவாகுமே தவிர, ‘ஒரேவிதம்‘ என்ற அடிப்படையில் ஒற்றுமையை உண்டாக்க முடியாது!”

அதே உரையில்...

‘உயர்தனிச் செம்மொழியான  தமிழ்மொழி என்னுடைய தாய்மொழி‘ என்ற பெருமிதம் எனக்கிருக்கிறது! நீண்ட வரலாற்றையும் புகழ்மிக்க பொற்காலங்களையும் உடைய மொழி-கவிஞர் யாத்த மொழி- கவிதைகள் கொஞ்சும் மொழி-கருத்தாலும் கவினுறு வளத்தாலும் கடலெனப் பரந்துகிடக்கும் மொழி- எங்கள் உயிருடன், வாழ்வுடன் கலந்த மொழி – அந்தத் தமிழ் மொழி மற்றெதற்கும் தாழாத வகையில் ஆட்சி மொழி என்ற தகுதி தரப்படும் வரை, நான் அமைதி பெற மாட்டேன்- திருப்தி அடைய மாட்டேன்!

நான் தமிழுக்காக வாதாடுகிறேன், அதை வைத்து. இந்திக்காக வாதாடுபவர்களின்  தாய்மொழிப் பற்றை நான் மறுக்கவில்லை. அவர்கள் இந்திக்காகப் பாடுபடட்டும்.

இவ்வுரை நிகழ்த்தப்பட்டு 55 ஆண்டுகள் முடிந்துவிட்டன. அறிஞர் அண்ணா குறிப்பிட்ட

பிரச்னைகளுக்கு  ஒன்றிய அரசு தீர்வுகாண இன்று வரை முன் வரவில்லை. பிரச்னைகளையும்

சிக்கல்களையும் பெருக்கி, இந்தியா ஒற்றுமையாக இருக்குமா? என்ற ஐயத்தை அல்லவா இன்று ஆட்சியாளர்களின் செயல்பாடுகள் உள்ளன.

5. திருக்குறள் கலைஞர் உரை (திருமகள் நிலையம், 1996, சென்னை)

15 பதிப்புகளைக் கண்டு வருகிறது இந்நூல். பல தமிழ் பேரறிஞர்கள் உரை எழுதி வள்ளுவத்தை உயர்த்தியுள்ளனர். அரசியல் தளத்தில் வ.உ.சி., இராஜாஜி போன்றவர்கள் சில குறள்களுக்கு மட்டும் உரை எழுதியுள்ளனர். சென்னையில் வள்ளுவர் கோட்டம், குமரியில் 133 அடி உயர வள்ளுவர் சிலை அமைத்த தமிழ்நாட்டு முதல்வர் கலைஞர், பன்முக ஆற்றலுடைய ஓர் எழுத்தாளர். அரசியல் தலைவராக  இருந்தும் 1330 அருங்குறள்களுக்கும் அவர் எழுதிய உரை தனித்தன்மையானது. எளிமையானது. குறளினுடைய  அடிப்படைக் கூறுகளைச் சிதைக்காமல் சிறந்த முறையில் எழுதப்பட்ட உரை. சான்றாக, வான் சிறப்பு அதிகாரத்தில் 18ஆம் குறளுக்கு அளித்த விளக்கம் -

சிறப்பொடு பூசனை செல்லாது வானம்

வறக்குமேல் வானோர்க்கும் ஈண்டு.

வானமே பொய்த்து விடும்போது, அதன் பின்னர் அந்த வானத்தில் வாழ்வதாகச் சொல்லப்படுகிறவர்களுக்கு விழாக்கள் ஏது? வழிபாடுகள்தான் ஏது?. இந்த உரை வள்ளுவரின் குறளோடு ஒன்றிப் போகிறதல்லவா.

அறன் வலியுறுத்தல் அதிகாரத்தில் குறள் 34

மனத்துக்கண் மாசிலன் ஆதல் அனைத்தறன்

ஆகுல நீர பிற.

ஜி.யூ.போப் தொடங்கி தமிழ் பேரறிஞர் அ.ச.ஞானசம்பந்தம் வரை இக்குறள்தான் அவர்களுக்குப் பிடித்த முதல் குறள் என்று கூறி சிறப்பித்துள்ளனர். எட்டு சொற்களிலேயே கலைஞர் அளித்த விளக்கம் -

“மனம் தூய்மையாக இருப்பதே அறம், மற்றவை

ஆரவாரத்தைத் தவிர வேறொன்றுமில்லை...

ஆழமானது, அறிவுப்பூர்வமானது.

உறங்குவது போலுஞ் சாக்கா டுறங்கி

விழிப்பது போலும் பிறப்பு – குறள் 339

இக்குறள் இயங்கியல் கூறுகளைத் தொட்டுச் செல்லும் குறளாகும். மாவோ இயங்கியலை விளக்கும் போது, பிறப்பின்றி இறப்பு இல்லை. இறப்பின்றி பிறப்பில்லை (Without birth there is no death. Without death there is no birth).). கலைஞர் இக்குறளுக்கு அளித்த விளக்கம் - நிலையற்ற வாழ்க்கையில் உறக்கத்திற்குப் பிறகு விழிப்பதைப்  போன்றது பிறப்பு, திரும்ப விழிக்க முடியாத மீளா உறக்கம் கொள்வதே இறப்பு. கலைஞர், வள்ளுவர் சொன்ன இரண்டாம் வரியை முதலில் குறிப்பிட்டு முதல் வரியை இரண்டாவதாகக் குறிப்பிடுகிறார். நிற்காமல் உட்கார முடியாது. உட்காராமல் நிற்க முடியாது என்பதும் இயங்கியல் கோட்பாட்டின் ஒரு கூறாகும். கண் திறப்பதும் கண் மூடுவதும் நேர் எதிரானவையே. ஆனால் இந்த முரண்பாடுதான் இயங்கியல் தத்துவத்தின் அடிப்படைக் கூறு. இந்தக் கூற்றைச் சிறப்பான வகையில் கலைஞர் விளக்கியுள்ளது அவரின் அறிவுச் சான்றாண்மையை எடுத்தியம்புகிறது.

பல பதிப்புகளைக் கலைஞர் உரை கண்டாலும், அரசியல் மாணாக்கர்களும், அரசியலில் ஈடுபட விரும்புபவர்களும் மேற்கூறிய நான்கு நூல்களுடன் இந்நூலையும் இணைத்துப் பார்த்தால் இருள் விலகும். ஒளி பிறக்கும். அறிவு விரியும். ஆளுமை பெருகும்.

பிப்ரவரி, 2021