தமிழ் நாடு
தமிழக வெற்றிக் கழக மாநாட்டு திடலில் இடம்பெற்றுள்ள காமராஜர், பெரியார், அம்பேத்கர் ஆகியோருக்கு நடுவே விஜய் இடம்பெற்றுள்ள கட்-அவுட் புகைப்படங்கள் சமூக ஊடகத்தில் வைரலாகி உள்ளதோடு விவாதத்தையும் கிளப்பியுள்ளது.
விக்கிரவாண்டி அடுத்த வி.சாலையில் வரும் 27ஆ ம் தேதி மாலை தமிழக வெற்றிக் கழகத்தின் முதல் மாநில மாநாடு நடைபெறவுள்ளது. மாநாட்டுக்கு இன்னும் 4 நாட்களே உள்ள நிலையில் மாநாட்டு ஏற்பாடுகளை ஒப்பந்ததாரர்கள் இரவு பகலாக செய்து வருகின்றனர்.
மாநாடு நுழைவாயிலில் கோட்டையின் மதில் சுவர் போல செட் அமைக்கப்பட்டு அதில் 2 யானைகள் முன்னங்கால்களை உயர்த்தி பிளிறும் வகையில் அமைக்கப்பட்டுள்ளது. மேடையில் ‘வெற்றிக் கொள்கை திருவிழா’என்கிற வாசகத்துடன் பேனர் வைக்கப்பட்டுள்ளது.
இந்த நிலையில், மாநாட்டு திடலில் தலைவர்களின் பிரம்மாண்ட கட்-அவுட்கள் இடம்பெற்றுள்ளன. காமராஜர், பெரியார், அம்பேத்கர் ஆகியோரின் பிரம்மாண்ட கட்-அவுட்களுக்கு நடுவே தவெக தலைவர் விஜய்யின் கட்-அவுட்டும் இடம்பெற்றுள்ளது. இது தொடர்பான வீடியோக்கள், புகைப்படங்கள் சமூக ஊடகங்களில் விவாதத்தை கிளப்பி உள்ளது.
அண்ணாவைத் தவிர்த்துவிட்டு தமிழ்நாட்டில் அரசியல் செய்ய முடியாதா என ஒருதரப்பு விமர்சிக்கத்தொடங்க, எம்.ஜி.ஆர். படமும் விடுபட்டிருப்பதாக மற்றொரு தரப்பினர் ஆதங்கப்பட்டுள்ளனர்.
