தமிழ் நாடு
சமூகநலத் துறையின் பணியாளர் விளம்பரத்தில் இந்தியும் தகுதியென குறிப்பிட்ட அதிகாரியை இடைநீக்கம் செய்து துறைரீதியாக நடவடிக்கை எடுக்கப்பட்டுள்ளது.
சமூக நலன் மற்றும் மகளிர் உரிமைத்துறையின் அமைச்சர் கீதா ஜீவன் அறிக்கை ஒன்றில் இதைத்தெரிவித்துள்ளார்.
இத்துறையின்கீழ் இயங்கும், சமூக நல ஆணையரகம் மூலம் பாதிப்புக்கு உள்ளாகும் மகளிருக்கு உதவிட பெண்களுக்கான கட்டுப்பாட்டு மையம், “மகளிர் உதவி எண்.181” சென்னையில் செயல்பட்டு வருகிறது. மகளிர் உதவி எண்.181 பணியிடத்தில் ஏற்பட்டுள்ள காலிப் பணியிடங்களை உடனடியாக நிரப்பிடும் பொருட்டு, விண்ணப்பங்களைப் பெற tn.gov.in என்ற இணையதளத்தில் ஆட்சேர்ப்புக்கான அறிவிக்கை, சமூக நல ஆணையரக இணை இயக்குநரால் பதிவேற்றம் செய்யப்பட்டது. அதில் ’அழைப்பு ஏற்பாளர்’ (Call Responders) என்று குறிப்பிடப்பட்டுள்ள பணியிடத்திற்குத் தேவையான தகுதிகள் என தமிழ், ஆங்கிலத்துடன் இந்தியும் பதிவேற்றம் செய்யப்பட்டது.
இந்தியும் எனச் சேர்த்தது தவறுதலாக நடந்துவிட்டது என்றும்,
இந்த ஆட்சேர்ப்புக்கான அறிவிக்கை தமிழ்நாடு அரசின் கவனத்திற்கு வந்தவுடன், அவ்விளம்பரம் உடனடியாக இணையதளத்தில் இருந்து நீக்கப்பட்டு, தமிழ் மற்றும் ஆங்கிலம் தெரிந்த நபர்கள் விண்ணப்பிக்கலாம் என்று திருத்தப்பட்ட ஆட்சேர்ப்பு அறிவிக்கை உடனடியாக பதிவேற்றம் செய்யப்பட்டது என்றும் அமைச்சர் தெரிவித்துள்ளார்.
மேலும், தவறுதலாக இணையத்தில் பதிவேற்றம் செய்த இணை இயக்குநர் உடனடியாக பணியிடை நீக்கம் செய்யப்பட்டு, அவர் மீது துறை ரீதியான ஒழுங்கு நடவடிக்கை மேற்கொள்ளப்பட்டுள்ளது என்றும் அவர் கூறியுள்ளார்.
தமிழ்மொழி வளர்ச்சிக்கான இவ்வரசின் பல்வேறு சாதனைகளை பட்டியலிட்டுக் கொண்டே போகலாம் எனக் குறிப்பிட்டுள்ள அவர்,
”ஒரு அரசு அலுவலர் செய்த தவறை வைத்துக் கொண்டு அரசியல் செய்யும் நிலையில் சிலர் உள்ளதைப் பார்த்தால் பரிதாபமாக உள்ளது. தமிழ் குறித்து எங்களுக்கு எவரும் பாடம் எடுத்து கூச்சல் போட வேண்டியதில்லை. இந்த ஆட்சியில், தமிழ் மொழி மென்மேலும் சிறப்புகள் பெற்று வளர்ந்து வருகிறது. இதனைக் காண சகிக்காதவர்கள் தான் இப்போது கூக்குரல் இடுகிறார்கள். அதனை புறம் தள்ளி, எங்கள் தாய்மொழியாம் தமிழ்வழிப் பயணத்தைச் சிறப்புற தொடர்வோம்.” என்றும் தன் அறிக்கையில் கூறியுள்ளார்.
