சினிமா
“ஒரு மனிதனை இன்னும் மேம்பட்ட மனிதனாக மாற்றும் அல்லது மாற்ற முயல்கிற படங்களே சிறந்த படங்களாகும்” என்று இயக்குநர் ஹெச்.வினோத் நந்தன் திரைப்படத்தின் இசை வெளியீட்டு விழாவில் பேசியுள்ளார்.
‘அயோத்தி’, ‘கருடன்’ என அடுத்தடுத்து இரண்டு வெற்றிகளைக் கொடுத்திருக்கும் சசிகுமார் நடிப்பில் விரைவில் வெளிவரவிருக்கிறது ‘நந்தன்’ திரைப்படம். ‘கத்துக்குட்டி’, ‘உடன் பிறப்பே’ ஆகிய படங்களைத் தொடர்ந்து இரா.சரவணன் எழுதி, இயக்கியிருக்கும் அவருடைய மூன்றாவது படம் இது. படத்துக்கு ஜிப்ரான் இசையமைத்துள்ளார். இந்தப் படம் வரும் செப்டம்பர் 20ஆம் தேதி திரையரங்குகளில் வெளியாகிறது.
இந்நிலையில் நந்தன் படத்தின் இசை வெளியீட்டு நேற்று நடைபெற்றது. இதில் கலந்து கொண்ட இயக்குநர் ஹெச்.வினோத் பேசியதாவது:
என்னைப் பொறுத்தவரையில் எது நல்ல படம் என்றால் பெரிய பட்ஜெட் கொண்ட படமோ பெரிய நடிகர்கள் நடிக்கும் படமோ அல்லது பாக்ஸ்-ஆபிஸ் வசூலிக்கும் படங்களோ அல்ல. ஒரு மனிதனை இன்னும் மேம்பட்ட மனிதனாக மாற்றும் அல்லது மாற்ற முயல்கிற படங்களே சிறந்த படங்களாகும். நந்தன் சிறந்த படம். சரவணன் பத்திரிகைத்துறையிலிருந்து வந்தவர் என்பதாலோ, சசிகுமார் நல்லவர் என்பதாலோ இல்லாமல் இந்த படம் நல்ல படம். அனைவரும் ஆதரவு அளியுங்கள் என்றார்.
ஹெச்.வினோத் இயக்கும் விஜய்யின் 69 பட அறிவிப்பு இன்று மாலை வெளியாகவுள்ளது குறிப்பிடத்தக்கது.
