சினிமா
மலையாள நடிகர்கள் சங்கத் தலைவர் பொறுப்பிலிருந்து நடிகர் மோகன்லால் பதவி விலகி உள்ளார்.
கடந்த 2017ஆம் ஆண்டில் மலையாள நடிகையொருவா் பாலியல் ரீதியாக துன்புறுத்தப்பட்ட வழக்கில் கேரள அரசால் அமைக்கப்பட்ட நீதிபதி ஹேமா தலைமையிலான குழுவின் அறிக்கை கடந்த வாரம் வெளியானது. அதில் மலையாள திரையுலகில் பணிபுரியும் பெண்கள் பலரும் அடுக்கடுக்கான பாலியல் குற்றச்சாட்டுகளை முன்வைத்தனர்.
இந்தப் புகார்கள் குறித்து விசாரணை நடத்த காவல்துறை அதிகாரிகள் 7 போ் அடங்கிய சிறப்புக் குழுவை கேரள அரசு ஞாயிற்றுக்கிழமை அமைத்தது.
நடிகைகள் ரேவதி சம்பத், ஸ்ரீலேகா, மினு முனீர் உள்ளிட்டோர் நடிகர்கள் சித்திக், ரியாஸ் கான், முகேஷ், ஜெயசூா்யா, மணியன்பிள்ளை ராஜு மற்றும் இடவேலா பாபு ஆகிய மற்றும் இயக்குநர் ரஞ்சித் ஆகியோர் மீது பாலியல் குற்றச்சாட்டுகளை சுமத்தியுள்ளது பெரும் பரபரப்பை ஏற்படுத்தியுள்ளது.
இந்தக் குற்றச்சாட்டுகளைத் தொடர்ந்து, நடிகர் சித்திக் மலையாள நடிகர்கள் சங்கத்தில் (அம்மா) பொறுப்பு வகித்த பொதுச்செயலர் பதிவியை ராஜிநாமா செய்தார். அதேபோல், இயக்குநர் ரஞ்சித்தும் கலாசித்ரா அகாதெமியின் தலைவர் பொறுப்பிலிருந்து விலகினார்.
இந்த நிலையில், தற்போது அம்மா அமைப்பின் தலைவரான நடிகர் மோகன்லால் தன் பதவியை ராஜினாமா செய்துள்ளார். அவருடன், நடிகர்கள் சங்கத்தின் 17 பொறுப்பாளர்களும் விலகி உள்ளனர். புதிய செயற்குழு இரண்டு மாதத்தில் அமைக்கப்படும் என தெரிவிக்கப்பட்டுள்ளது. சங்கத்தின் பணிகளை தற்காலிக குழு நிர்வகிக்கும் என தெரிவிக்கப்பட்டுள்ளது.
பாலியல் குற்றச்சாட்டுக்கு உள்ளானவர்கள் அம்மா அமைப்பிலிருந்து பதவி விலக வேண்டும் என நடிகர் பிருத்விராஜ் உட்பட பல்வேறு நடிகர்கள் கோரிக்கை வைத்திருந்த நிலையில், மோகன் லால் உட்பட 17 செயற்குழு உறுப்பினர்களும் ராஜினாமா செய்துள்ளனர்.
மேலும், நடிகைகள் அளித்த பாலியல் குற்றச்சாட்டுகளால் நடிகர் மோகன்லால் மீதும் கடும் விமர்சனங்கள் எழுந்து வருகின்றன. காரணம், மலையாள நடிகர்கள் சங்கத்தின் தலைவராக இருக்கும் மோகன்லாலுக்கு சித்திக்கின் பாலியல் தொல்லைகள் குறித்து தெரியாமல் இருக்குமா? இது தெரிந்தும் மோகன்லால் ஏன் இவ்வளவு நாள்களாக சித்திக் மேல் எந்த நடவடிக்கையும் எடுக்கவில்லை? இதைப்பற்றி எதுவும் தெரியாது என்றால் சக நடிகைகளுக்கு நிகழ்ந்த பாலியல் வன்முறைகளைக்கூட அறியாத நடிகர் சங்கத் தலைவராக எதற்காக இருக்கிறார்? என பலரும் கேள்வியெழுப்பி வருகின்றனர்.
