சென்னையில் கனமழைக்கான எச்சரிக்கை விடுக்கப்பட்டுள்ள நிலையில், வேளச்சேரி மேம்பாலத்தில் இப்போதே கார்களை உரிமையாளர்கள் நிறுத்தி வருகின்றனர்.
சென்னை மற்றும் புறநகர்ப் பகுதிகளில் நாளை மிக கனமழையும், நாளை மறுநாள் அதி கனமழையும் பெய்யக் கூடும் என்று சென்னை வானிலை ஆய்வு மையம் எச்சரிக்கை விடுத்துள்ளது.
மேலும், ஒரே நாளில் 200 மி.மீ. அளவு மழையும், நான்கு நாள்களில் 400 மி.மீ. வரை மழையும் பெய்யக்கூடும் என்று தெரிவிக்கப்பட்டுள்ளது.
இந்த நிலையில், சென்னையில் மழை பெய்தால் வெள்ளத்தில் அதிகம் பாதிக்கக் கூடிய பகுதிகளில் ஒன்றாக வேளச்சேரி சுற்றுப் பகுதி உள்ளது.
இந்த பகுதியில் சாதாரண மழை பெய்தாலே வெள்ள நீர் சூழும் நிலை உள்ளதால், பெரு மழை காலங்களில் தங்களின் கார்கள் வெள்ளத்தில் சிக்கி பழுதாவதை தவிர்க்க வேளச்சேரி மேம்பாலத்தில் கார்களை நிறுத்துவதை சென்னைவாசிகள் வாடிக்கையாக வைத்துள்ளனர்.
அந்தவகையில், வானிலை மையம் ரெட் அலர்ட் கொடுக்கப்பட்டதை தொடர்ந்து, மழை தொடங்குவதற்கு முன்னதாகவே பாலத்தில் கார்களுக்கு இடத்தை பிடித்து வருகின்றனர் வேளச்சேரி மக்கள்.
இன்று காலை முதல் போட்டி போட்டிக் கொண்டு தங்களின் கார்களை வேளச்சேரி மேம்பாலத்தில் நிறுத்தி வருவதால், அந்த பகுதியில் கடுமையான போக்குவரத்து நெரிசல் ஏற்பட்டுள்ளது.