அமெரிக்கப் பயணம் முடிந்து நேற்று தமிழகத்துக்குத் திரும்பிய முதலமைச்சர் ஸ்டாலின், இன்று முதல் நாளாக அரசு நிகழ்ச்சியில் கலந்துகொண்டார்.
முன்னாள் முதலமைச்சர் அண்ணாவின் பிறந்த நாளான இன்று சென்னை, அண்ணா சாலையில் உள்ள அவரின் சிலைக்கு காலையில் சென்ற முதலமைச்சர் ஸ்டாலின், மலர் மரியாதை செலுத்தினார்.
அவருடன் துரைமுருகன் முதலிய மூத்த அமைச்சர்கள், அமைச்சர் உதயநிதி, சென்னை மேயர் பிரியா உட்பட பலரும் மரியாதை செலுத்தினர்.
அண்ணா பிறந்த நாளை முன்னிட்டு தி.மு.க. வழக்கம்போல முப்பெரும் விழாவைக் கொண்டாடுகிறது. இதையொட்டி தி.மு.க.வின் தலைமையகமான அண்ணா அறிவாலயம் நேற்று வண்ணமயமாக அலங்கரிக்கப்பட்டு, வண்ண வண்ண விளக்குகள் அமைக்கப்பட்டு அந்தப் பகுதியே ஒளிரும்படி செய்யப்பட்டிருந்தது.