சாலை விபத்தில் உயிரிழந்த தவெக நிர்வாகிகள் கலை, சீனிவாசன் உடலுக்கு அக்கட்சியின் பொதுச்செயலாளர் புஸ்ஸி ஆனந்த் நேரில் சென்று அஞ்சலி செலுத்தினார்.
தமிழக வெற்றிக் கழகத்தின் முதல் மாநாடு விக்கிரவாண்டி வி.சாலையில் நேற்று நடைபெற்றது. இதில் கலந்து கொள்வதற்காக தவெகவின் திருச்சி தெற்கு மாவட்ட இளைஞரணித் தலைவர் சீனிவாசன் தலைமையில் 5 பேர் காரில் சென்றனர். அவர்கள் சென்ற கார் உளுந்தூர்பேட்டை அருகே விபத்துக்குள்ளானதில் கட்சியின் திருச்சி தெற்கு மாவட்ட இளைஞரணி துணைத் தலைவர் கலையரசன், திருச்சி மாவட்ட இளைஞரணித் தலைவர் சீனிவாசன் ஆகிய இருவரும் சிகிச்சை பலனின்றி உயிரிழந்தார்.
அவர்களின் மறைவுக்கு மாநாட்டில் இரங்கல் தெரிவிக்கப்படும் என உயிரிழந்தவர்களின் உறவினர்கள் எதிர்பார்த்த நிலையில், அப்படி எதுவும் அறிவிக்கப்படாததால், அவர்களின் உறவினர்கள் அதிர்ச்சி அடைந்தனர்.
இந்த நிலையில், விபத்தில் சிக்கி உயிரிழந்த சீனிவாசன், கலை உடலுக்கு நேரில் சென்று அஞ்சலி செலுத்திய தவெக பொதுச்செயலாளர் புஸ்ஸி ஆனந்த், அவர்களின் குடும்பங்களுக்கு ஆறுதல் தெரிவித்தார்.
இதைத் தொடர்ந்து செய்தியாளர்களை சந்தித்த புஸ்ஸி ஆனந்த் கூறியதாவது:
விஜய் நேரில் சென்று இரங்கல் தெரிவிக்க சொன்னார். இப்போது இரங்கல் தெரிவித்து உள்ளோம். எங்கள் கட்சிக்கு பெரிய இழப்பு. அவர்களின் குடும்பத்தை எங்கள் கட்சி பார்த்துக் கொள்ளும்.” என்றார்.