பரபரப்பான அரசியல் சூழ்நிலையில் நாளை அ.தி.மு.க. மாவட்ட செயலாளர்கள் கூட்டம் நடைபெறும் என அறிவிக்கப்பட்டுள்ளது.
அ.தி.மு.க. பொதுச்செயலாளர் எடப்பாடி பழனிசாமி தலைமையில் நாளை சென்னை ராயப்பேட்டையில் உள்ள தலைமை அலுவலகத்தில் மாலை 4 மணிக்கு மாவட்ட செயலாளர்கள் கூட்டம் நடைபெற உள்ளது.
இந்த கூட்டத்தில் பங்கேற்க சட்டமன்ற, நாடாளுமன்ற உறுப்பினர்கள், தலைமை கழக நிர்வாகிகள் அனைவருக்கும் அழைப்பு விடுக்கப்பட்டுள்ளது. இதில் நாடாளுமன்ற பணிகள், அண்ணாமலை - அ.தி.மு.க. இடையே மோதல் போக்கு நிலவி வரும் சூழல், அ.தி.மு.க.-பா.ஜ.க. கூட்டணி குறித்து, அடுத்தகட்ட முடிவெடுக்கப்பட வாய்ப்பு உள்ளதாக கூறப்படுகிறது.
அ.தி.மு.க. முன்னாள் அமைச்சர்கள் குழுவினர் நேற்று டெல்லியில் பா.ஜ.க. தேசிய தலைவர் ஜே.பி.நட்டா, மத்திய மந்திரி பியூஷ்கோயல் ஆகியோரை சந்தித்து அண்ணாமலை விவகாரம் பற்றி அவர்கள் பேசியது குறிப்பிடத்தக்கது.