நடிகர் அஜித்துடன் முதல் முறையாக இணைந்து நடிக்க உள்ள நடிகர் பிரசன்னா தன்னுடைய பலநாள் கனவு நிறைவேறியுள்ளதாக நெகிழ்ச்சியுடன் கூறியுள்ளார்.
ஆதிக் ரவிச்சந்திரன் இயக்கத்தில் அஜித் குமார் 'குட் பேட் அக்லி' என்கிற படத்தில் நடித்து வருகிறார். மைத்ரி மூவி மேக்கர்ஸ் நிறுவனம் தயாரிக்கும் இப்படத்திற்கு தேவிஸ்ரீ பிரசாத் இசையமைக்கிறார். ஏற்கனவே இந்த படத்தில் த்ரிஷா, சுனில், அர்ஜுன் தாஸ், ராகுல் தேவ் ஆகியோர் முக்கிய கதாபாத்திரங்களில் நடிக்கின்றனர். இப்போது இப்படத்தில் மற்றொரு முக்கிய கதாபாத்திரத்தில் நடிக்க நடிகர் பிரசன்னா இணைந்ததாக தகவல் வெளியாகியுள்ளது. அஜித்துடன் வலிமை படத்திலேயே இணைந்து நடிக்க வேண்டியவர் பிரசன்னா.
இந்நிலையில், நடிகர் பிரசன்னா தனது எக்ஸ் பக்கத்தில், அஜித்துடன் குட் பேட் அக்லி படத்தில் தான் நடிப்பதாக தெரிவித்துள்ளார். அதில், "எனது அன்பிற்குரிய நண்பர்களே, நலம் விரும்பிகளே, இந்த முறை நமது அன்புக்குரிய தல அஜித்குமார் சாரின் படத்தில் நான் ஒரு பகுதியாக இருப்பது உண்மைதான். அஜித் சார் படத்தில் நடிக்க வேண்டும் என்பது என்னுடைய பலநாள் கனவு.
மங்காத்தா படத்திலிருந்து அஜித்தின் ஒவ்வொரு படத்திலும் நான் நடிப்பதற்கான வாய்ப்பு இருந்தது. இதனால் அஜித் சாரின் ரசிகர்கள் பலமுறை அவரது படத்தில் நான் இருக்கின்றேன் என நினைத்து வாழ்த்தியுள்ளார்கள். ஆனால், கைக்கு எட்டியது வாய்க்கு எட்டவில்லை என்பது போல் நிறைய விஷயங்கள் நடந்தன. ஆனால் இறுதியாக, அந்த வாய்ப்பு எனக்கு கிடைத்துள்ளது. இதனை உங்களிடம் தெரிவிக்க இதைவிட சிறந்த நேரம் இருக்க முடியாது. நான் குட் பேட் அக்லியின் ஒரு பகுதியாக இருக்கிறேன். அஜித் சார், ஆதிக், சுரேஷ் சந்திரா சார், மைத்ரி மூவிஸ், கடைசியாக தலவுடன் என்னைப் பார்க்க விரும்பிய அனைவருக்கும் நன்றியைத் தெரிவித்துக் கொள்கிறேன். நான் மகிழ்ச்சியாகவும் உற்சாகமாகவும் இருக்கிறேன். என்னால் இப்போது என்னால் படம் குறித்து அதிகம் கூறமுடியாது, அதற்காக என்னை மன்னிக்கவும்.
எனது போர்ஷன் படப்பிடிப்பு சில நாட்களுக்கு முன்னர் எடுக்கப்பட்டது. அதேநேரத்தில் என்னால் ஒன்று மட்டும் சொல்ல முடியும், அஜித் சார் இப்படியான நபராக இருப்பதால்தான் அவர் மிகவும் நேசிக்கப்படுகிறார். மேலும் அவரைப் பற்றி உங்களுக்கும் எனக்கும் தெரிந்ததுதான் அஜித்சார். பணிவு நிரம்பிய மனிதன், மிகவும் எளிமையான மனிதராகவும் உள்ளார். நன்றி, உங்கள் அனைவருக்கும் அன்புகள்." என பதிவிட்டு தனது புகைப்படத்தையும் பகிர்ந்துள்ளார். அதில் ஹேர் ஸ்டைலில் டைல் விட்டுக் கொண்டு மிகவும் அட்டகாசமான லுக்கில் உள்ளார் பிரசன்னா. மேலும் இந்தப் படத்தில் அஜித்தின் வில்லனாக நடிக்கின்றார் என கூறப்படுகின்றது.