சென்னையில் உள்ள தகவல்நுட்ப நிறுவனங்களை இரண்டாம்நிலை நகரங்களுக்கும் கொண்டுசெல்வது எனும் முயற்சியாக, விழுப்புரம் மாவட்டத்தில் கடந்த பிப்ரவரியில் ஒரு மினி டைடல் பூங்கா திறந்துவைக்கப்பட்டது. அதைத் தொடர்ந்து, தஞ்சாவூர், சேலம் மாவட்டங்களில் கட்டப்பட்ட மினி டைடல் பூங்காக்களை முதலமைச்சர் ஸ்டாலின் இன்று திறந்துவைத்தார்.
தஞ்சாவூர் மினி டைடல் பூங்கா
தஞ்சாவூர் மாவட்டம், தஞ்சாவூர் வட்டம், பிள்ளையார்பட்டி கிராமத்தில் 30 கோடியே 50 இலட்சம் ரூபாய் செலவில் தரை மற்றும் மூன்று தளங்களுடன் 55,000 சதுர அடி பரப்பளவில் அமைக்கப்பட்டுள்ளது. இதில் M/s. Hamly Business Solutions India Pvt. Ltd., M/s. Inforios Software Technologies India Pvt. Ltd., ஆகிய நிறுவனங்களுக்கு தள ஒதுக்கீட்டுக்கான ஆணைகளையும் முதலமைச்சர் வழங்கினார். தஞ்சாவூர் மினி டைடல் பூங்கா கட்டடத்தில் 30 சதவீத தள ஒதுக்கீடு வழங்கப்பட்டுள்ளது.
சேலம் மினி டைடல் பூங்கா
சேலம் மாவட்டம், ஓமலூர் வட்டம், கருப்பூர் கிராமம், ஆனைக்கவுண்டன்பட்டியில் 29 கோடியே 50 இலட்சம் ரூபாய் செலவில் தரை மற்றும் மூன்று தளங்களுடன் 55,000 சதுர அடி பரப்பளவில் கட்டப்பட்டுள்ளது. M/s. Namma Office, M/s. AKS Hitech Smart, M/s. Tamil Zorous Pvt. Ltd., M/s. Telth Healthcare Pvt. Ltd., Solutions, M/s. Access Healthcare ஆகிய நிறுவனங்களுக்கும் தள ஒதுக்கீட்டுக்கான ஆணைகள் வழங்கப்பட்டுள்ளன. இதில் 71 சதவீத தள ஒதுக்கீடு தற்போது வரை வழங்கப்பட்டுள்ளது.
இந்த மினி டைடல் பூங்கா கட்டடங்களில் தலா 500 தகவல் தொழில்நுட்ப வல்லுநர்கள் பணிபுரியும் வகையில் குளிர்சாதன வசதிகள், தொலைத்தொடர்பு வசதிகள், தடையற்ற உயரழுத்த மும்முனை மின் இணைப்பு, மின் இயக்கி வசதிகள், மின்தூக்கி வசதிகள், குடிநீர் மற்றும் சுகாதார வசதிகள்,
தீ பாதுகாப்பு மற்றும் கட்டட மேலாண்மை வசதிகள், மின் விளக்குகளுடன் கூடிய உட்புற சாலை வசதிகள், 24X7 பாதுகாப்பு வசதிகள், உணவகம் மற்றும் உடற்பயிற்சி கூடம் ஆகியவை செய்யப்பட்டுள்ளன.
இந்த மாவட்டங்களில் படித்த இளைஞர்கள் வேலைவாய்ப்பு பெறுவதுடன் அம்மாவட்டங்களின் சமூக பொருளாதார நிலையும் மேம்படும் என அரசு நம்பிக்கை தெரிவித்துள்ளது.