கமல் படத்துக்காக காத்திருக்க முடியாது…! - லோகி ட்வீட்

இந்தியன் - 2 படத்தை பாராட்டியுள்ள இயக்குநர் லோகேஷ் கனகராஜ் இந்தியன் மூன்றாம் பாகத்திற்காகக் காத்திருக்க முடியாது என கூறியுள்ளார்.

இயக்குநர் ஷங்கர் இயக்கிய இந்தியன் திரைப்படத்தின் இரண்டாவது பாகம் வெள்ளிக்கிழமை உலகம் முழுவதும் வெளியானது.

இந்தப் படத்தில் கமல்ஹாசன், சித்தார்த், பாபி சிம்ஹா, விவேக், எஸ்.ஜே.சூர்யா, காஜல் அகர்வால், ரகுல் ப்ரீத் சிங் உள்ளிட்டோர் பிரதான வேடங்களில் நடித்துள்ளனர்.

ஊழலை மையமாகக் கொண்டு உருவான இப்படம் கலவையான விமர்சனங்களைப் பெற்றாலும், சமூக ஊடகங்களில் கடுமையான எதிர்வினைகளைச் சந்தித்து வருகிறது.

படத்தின் மீதான எதிர்மறை விமர்சனங்களைத் தவிர்க்க படக்குழு, 3 மணி நேர படத்தில் 20 நிமிட காட்சிகளை நீக்கியுள்ளது. தற்போது, 2.40 மணி நேரம் ஓடக்கூடிய படமாகவே இந்தியன் - 2 படத்தைக் காண முடியும்.

இந்த நிலையில், இயக்குநர் லோகேஷ் கனகராஜ் எக்ஸ் பக்கத்தில், “இந்தியன் - 2 நமது உலக நாயகன் கமல்ஹாசனின் ஈடுபாடுடன் கூடிய உழைப்புக்கு உதாரணம். பெரிய நோக்கங்களுக்காக இயக்குநர் ஷங்கருக்கும் பின்னணி இசைக்காக அனிருத்துக்கும் பாராட்டுகள். இந்தியன் - 3 படத்திற்காகக் காத்திருக்க முடியாது.” எனத் தன் ஆவலைத் தெரிவித்துள்ளார்.

அதேபோல், இயக்குநர் கார்த்திக் சுப்புராஜ், “ இந்தியன் - 2 படத்தை ரசித்தேன். இயக்குநர் ஷங்கர் சாரின் பெரிய எண்ணங்களுக்கு வாழ்த்துக்கள். நீங்கள் எப்போதும் எங்களின் முன்னோடி. கமல் சார் எப்போதும்போல் நெருப்புதான். படம் முகத்தில் அறைகிற கடுமையான எதார்த்தங்களை பேசியது பிடித்திருக்கிறது.” என பதிவிட்டுள்ளார்.