யார் இந்த திரௌபதி முர்மு?

பாஜக தலைமையிலான தேசிய ஜனநாயகக் கூட்டணி சார்பில் குடியரசு தலைவர் வேட்பாளராக ஒடிசாவைச் சேர்ந்த பழங்குடித் தலைவர் திரௌபதி முர்மு (64) அறிவிக்கப்பட்டுள்ளார். நேற்று (ஜூன் -21) கூடிய பாஜகவின் நாடாளுமன்ற குழுக்கூட்டத்தில் இந்த முடிவு எடுக்கப்பட்டுள்ளது

 
எதிர்க்கட்சிகளின் சார்பில் யஷ்வந்த் சின்கா அறிவிக்கப்பட்டுள்ள நிலையில் ஜூலை 18ஆம் தேதி குடியரசுத் தலைவருக்கான தேர்தல் நடைபெறவுள்ளது.

இந்நிலையில், பாஜகவின் குடியரசுத் தலைவர் வேட்பாளராக அறிவிக்கப்பட்டிருக்கும் திரௌபதி முர்முவை பற்றித் தெரிந்து கொள்ள வேண்டிய பத்து முக்கியமான விஷயங்கள்.

1.  திரௌபதி முர்மு குடியரசுத் தலைவராகத் தேர்ந்தெடுக்கப்பட்டால், நாட்டின் முதல் பழங்குடியின குடியரசு தலைவர், இரண்டாவது பெண் குடியரசுத் தலைவர் ஆவார்.

2.  ஓடிசா மாநிலம், மயூர்பஞ்ச் மாவட்டத்தைச் சேர்ந்த முர்மு அரசியலில் நுழைவதற்கு முன்பாக ஆசிரியராக பணியாற்றியுள்ளார்.

3.  ராய்ரங்பூர் தொகுதியிலிருந்து இரண்டு முறை சட்டமன்ற உறுப்பினராக இருந்துள்ளார்(2000-2009). பாஜக சார்பில்.

4.  2017 குடியரசுத் தலைவர் தேர்தலின்போதும் திரௌபதி முர்முவின் பெயர் பரிசீலனையிலிருந்தது. எனினும், அப்போதைய பீகார் ஆளுநர் ராம்நாத் கோவிந்த் குடியரசுத் தலைவர் வேட்பாளராக அறிவிக்கப்பட்டார்.

5.  ஒடிசாவில் பாஜக- பிஜூ ஜனதா தளம் கூட்டணி ஆட்சியில் வர்த்தகம், போக்குவரத்துத்துறை, மீன், கால்நடை துறை அமைச்சராகவும் பதவி வகித்துள்ளார்.

6.  2009 ஒடிசா சட்டப்பேரவை தேர்தலில் பிஜூ ஜனதா தளத்தின் கை ஓங்கியிருந்தாலும், பாஜக சார்பில் நின்று வெற்றிவாகை சூடினார் முர்மு.

7.  முர்மு, 2015ஆண்டு மே 18ஆம் தேதி முதல் 2021ஆம் ஆண்டு ஜூலை 12ஆம் தேதி வரை ஜார்க்கண்ட் மாநிலத்தின் ஆளுநராகப் பதவி வகித்துள்ளார்.

8.  முர்மு தன்னுடைய தனிப்பட்ட வாழ்க்கையில் கணவர் ஷியாம் சரண் மற்றும் இரு மகன்களையும் இழந்தவர். அவருக்கு ஒரு மகள் மட்டும் உள்ளார்.

9.  முர்மு சட்டமன்ற உறுப்பினராகத் தேர்ந்தெடுக்கப்படுவதற்கு முன்பாக 1997ஆம் ஆண்டு நடைபெற்ற தேர்தலில் போட்டியிட்டு ராய்ரங்பூர் பஞ்சாயத்தின் கவுன்சிலரானார். அதன் பின்னர், பாஜகவின் பழங்குடி அணியின் துணைத் தலைவராகத் தேர்ந்தெடுக்கப்பட்டார்.

10. தேசிய ஜனநாயகக் கூட்டணியின் வேட்பாளரான முர்மு குடியரசுத் தலைவராகத் தேர்ந்தெடுக்கப்பட்டால், பழங்குடி மக்களிடையே தங்களின் செல்வாக்கு அதிகரிக்கும் என பாஜக எதிர்பார்க்கிறது.

தா.பிரகாஷ்