டேனிஷ் சித்திக் படுகொலை செய்யப்பட்டாரா? - அதிர்ச்சியை ஏற்படுத்தும் அறிக்கை!

ராய்ட்டர்ஸ் செய்தி நிறுவன புகைப்படச் செய்தியாளரும், புலிட்சர் விருது வென்றவருமான டேனிஷ் சித்திக், ஜூலை16ஆம் தேதி ஆப்கான் ராணுவத்தினருக்கும் தாலிபான்களுக்கும் நடந்த மோதலில் உயிரிழந்தார். அவரின் மறைவுச் செய்தி சர்வதேச அளவில் பெரும் அதிர்வலைகளை ஏற்படுத்தியதோடு, தாலிபான்களுக்கு எதிரான கண்டன குரல்கள் எழத் தொடங்கின.


“டேனிஷ் சித்திக்கின் மரணத்துக்கும் எங்களுக்கும் சம்மந்தம் இல்லை” என்று விளக்கம் அளித்த தாலிபான்கள், “போர்க்களத்திற்கு வரும் புகைப்படக்காரர்கள் எங்களிடம் தகவல் தெரிவிக்காமல் இருப்பதே இதுபோன்ற அசம்பாவிதங்களுக்குக் காரணம்” என வருத்தம் தெரிவித்தனர். சித்திக்கின் மரணம் தொடர்பான இந்த செய்தியே இன்று வரை உண்மை என நம்பப்பட்டு வரும் நிலையில், வாஷிங்டன் எக்ஸாமினர் என்ற அமெரிக்க பத்திரிகை வெளியிட்ட அறிக்கை ஒன்று அதிர்ச்சியை ஏற்படுத்தியுள்ளது.
 

அந்த அறிக்கையில், “ஆப்கானிஸ்தான் ராணுவத்தினருடன் சித்திக் செய்தி சேகரிக்க சென்றார். கந்தஹார் மாவட்டத்தின் போல்டாக் பகுதி அருகே சென்று கொண்டிருந்த போது, தாலிபான்கள் ராணுவத்தினரை நோக்கி தாக்குதல் நடத்தினர். இதனால் ஆப்கான் ராணுவ போர் தளபதிக்கும் - சித்திக்குக்கும் இடையேயான தொடர்பு துண்டிக்கப்பட்டுள்ளது. தாக்குதலில் காயமடைந்த சித்திக் அங்குள்ள ஒரு மசூதிக்குச் சென்ற நிலையில், அவருக்கு முதலுதவி சிகிச்சை அளிக்கப்பட்டுள்ளது. இது தொடர்பான தகவல் தாலிபான்களுக்குத் தெரிய வர, அங்குச் சென்ற தாலிபான்கள் சித்திக்கின் அடையாளத்தை உறுதிப்படுத்தியுள்ளனர். அப்போது அவர் உயிருடன் இருந்துள்ளார். சித்திக்கின் தலையைத் தாக்கியவர்கள் பின்னர் அவரது உடலைக் குண்டுகளால் துளைத்துள்ளனர். சித்திக்கை காப்பாற்ற நடந்த முயற்சியின் போதுதான் ஆப்கன் போர் தளபதியும், எஞ்சிய வீரர்களும் உயிரிழந்தனர்” என தெரிவிக்கப்பட்டுள்ளது.


இது தொடர்பாக அமெரிக்காவை சேர்ந்த ஆய்வாளர் மைக்கேல் ரூபின் கூறுகையில், “சமூக ஊடகங்களில் பரவலாகக் காணப்படும் இறந்த சித்திக்கின் புகைப்படத்தைத் தவிர, மற்ற புகைப்படங்களிலும், இந்திய அரசு பகிர்ந்து கொண்ட வீடியோவையும் மதிப்பாய்வு செய்தேன். தலைக்கு அருகே தீவிர காயங்கள் இருந்தன. கொடூரமாகத் தாக்கப்பட்ட பிறகு தான், சித்திக் சுட்டுக் கொல்லப்பட்டார்" என்றார்.


சித்திக்கின் மரணம் தொடர்பாக தாலிபான்கள் தாமாகவே முன்வந்து அளித்த விளக்கமும், தற்போது வாஷிங்டன் எக்ஸாமினர் வெளியிட்டுள்ள அறிக்கையும் பல்வேறு சந்தேகங்களையும், குழப்பங்களையும் ஏற்படுத்தியுள்ளது.