விருமன்: திரைவிமர்சனம்!

கெட்ட தந்தைக்கும் நல்ல மகனுக்கும் இடையில் நடக்கும் மோதல்களே ‘விருமன்’ திரைப்படம்.

 
தந்தை முனியாண்டியை (பிரகாஷ்ராஜ்) கொல்ல சிறுவயதிலேயே கத்தியைத் தூக்குகிறார் விருமன் (கார்த்தி). இதனால் தாய்மாமா (ராஜ்கிரண்) வீட்டில் வளர வேண்டிய சூழல் ஏற்படுகிறது. மூத்த அண்ணன்கள் மூவரும் தந்தையுடனே இருக்க, விருமன் மாமாவுடன் சேர்ந்து பந்தல் போடும் வேலை செய்கிறார். இடையிடையே தந்தையுடனும் மோதுகிறார். இருவருக்குமான மோதல் முற்றிக் கொண்டே சொல்ல, அதற்கான காரணமும் சொல்லப்படுகிறது.

 
முனியாண்டிக்கும் விருமனுக்கும் மோதல் முற்ற, நேரம் பார்த்துக் காத்திருந்தவர்கள் போல், இவர்கள் இருவரையும் தீர்த்துக் கட்ட துணிகிறது இன்னொரு தரப்பு. இதிலிருந்து தந்தையும், மகனும் மீண்டார்களா? இல்லையா? கெட்ட தந்தை மனம் திருந்தினாரா? இல்லையா? என்பதே படத்தின் மீதிக் கதை.

 
ஒரு குடும்பத்திற்குள் நடக்கும் முட்டல் மோதலை பரபரப்பாகவும் விறுவிறுப்பாகவும் எடுக்க முற்பட்டிருக்கிறார் இயக்குநர் முத்தையா. முழு படத்தையும் முனியாண்டி கதாபாத்திரம் முன்நகர்த்திச் சென்றாலும், அந்த கதாபாத்திர உருவாக்கம் காத்திரமாக இல்லாமல் போனது படத்திற்கு பெரும் இழப்பே. சந்தோஷம், இழப்பு, துரோகம், பழிவாங்கல் என உணர்ச்சி கொப்பளிக்கும் காட்சிகள் நிறைய இருந்தும், பார்வையாளர்களை படம் ஈர்க்கவில்லை.

 
விருமனாக நடித்திருக்கும் கார்த்தி கதாபாத்திரத்துக்கு ஏற்ற நடிப்பை வழங்கியிருக்கிறார். அதேபோல், முதல் படம் என்றே தெரியாத அளவிற்கு நடித்திருக்கிறார் அதிதி, அவருக்கு ரொமான்ஸ் கொஞ்சம் குறைவாகவே வருகிறது. அதற்குப் பதிலாக நடனத்தில் துள்ளியிருக்கிறார். சூரியின் காமெடிகள் சில இடங்களில் நம்மை ஆசுவாசப்படுத்துகிறது. ராஜ்கிரண், கருணாஸ், சூரி, வடிவுக்கரசி, சரண்யா பொன்வண்ணன் என ஒவ்வொருவரும் கிராமத்து மனிதர்களாகவே வாழ்ந்திருக்கின்றனர்.

 
கிராமத்தை அழகாக படம் பிடித்துள்ளார் ஒளிப்பதிவாளர் செல்வகுமார் எஸ் கே. படத்தொகுப்பும், கலை இயக்கமும் படத்திற்குத் தேவையான பங்களிப்பை செய்திருக்கிறது.

 
கதைக்கு என்ன தேவையோ அதையே வசனங்களாக எழுதியிருக்கும் இயக்குநர், பூலான்தேவி பற்றி எழுதியிருக்கும் வசனம் கண்டனத்துக்குரியது. யுவன் சங்கர் ராஜா மாஸ் கமர்சியலுக்கு தேவையான பின்னணி இசையைக் கொடுத்திருக்கிறார். ‘கஞ்சாப் பூவு கண்ணால’ பாடல் அளவுக்கு மற்ற பாடல்கள் அசைபோட வைக்கவில்லை.

 
மீசையும் மருவும் வைத்தால் மாறு வேஷம் என்பது போல், முந்தைய படங்களின் ஊரையும் பேரையும் மாற்றிவிட்டால் முத்தையாவின் படம் ரெடி!

தா.பிரகாஷ்