ஓ.டி.டி-யில் வெளியாகிறதா விஜய்யின் ‘மாஸ்டர்’?

விஜய் நடிப்பில் உருவாகியுள்ள ‘மாஸ்டர்’ திரைப்படத்தின் டிஜிட்டல் உரிமையை நெட்ஃபிளிக்ஸ் ஓடிடி தளம் கைப்பற்றியுள்ளது. இதனையடுத்து படம் திரையரங்குகளில் வெளியாகுமா என்ற கேள்வி எழுந்துள்ளது.

லோகேஷ் கனகராஜ் இயக்கத்தில், விஜய், விஜய் சேதுபதி, மாளவிகா மோகனன் ஆகியோர் நடிப்பில் உருவான ‘மாஸ்டர்’ திரைப்படம் தீபாவளிக்கு வெளியாக இருந்தது. கொரோனா காரணமாக திரையரங்குகள் திறக்கப்படாததால் படம் வெளியாவது அடுத்த வருடம் ஜனவரிக்கு தள்ளிப்போனது.

இதனையடுத்து ‘மாஸ்டர்’ படத்தை வாங்க பல்வேறு ஓடிடி நிறுவனங்கள் பேரம் பேசி வந்த போது, நடிகர் விஜய் தன் ரசிகர்களுக்காக படத்தை திரையரங்குகளில் மட்டுமே வெளியிட வேண்டும் என்று கேட்டுக் கொண்டதாக தகவல்கள் வெளியாகியது. தொடர்ந்து படத்தின் இயக்குனர் லோகேஷ் கனகராஜ், விஜய் ரசிகர்களுக்கான விருந்தாக திரையரங்குகளில் மட்டுமே ’மாஸ்டர்’ வெளியாகும் என்று உறுதிப்படுத்தியிருந்தார்.

இந்நிலையில், இப்படத்தின் டிஜிட்டல் உரிமையை தற்போது நெட்ஃபிளிக்ஸ் நிறுவனம் வாங்கியுள்ளது. இதுகுறித்து படத்தின் தயாரிப்பாளர் லலித் குமாரை தனியார் தொலைக்காட்சி ஒன்று தொடர்பு கொண்டபோது, திரையரங்குகளில் ரிலீஸ் செய்வதா அல்லது நேரடியாக ஒ.டி.டி-யில் ரிலீஸ் செய்வதா என்று இன்னும் முடிவு செய்யவில்லை என பதிலளித்துள்ளார்.

முன்னதாக அடுத்த வருடம் ஜனவரி மாதம் பொங்கலுக்கு ’மாஸ்டர்’ படம் வெளியாகும் என எதிர்பார்க்கப்பட்டது.