தெற்காசிய விளையாட்டு போட்டி: டிரையத்லானில் இந்தியாவுக்கு தங்கம்!

நேபாளத்தின் காத்மண்டு மற்றும் பொக்ரா நகரங்களில் 13வது தெற்காசிய விளையாட்டு போட்டி தொடங்கியுள்ளது. டிசம்பர் 10ம் தேதி வரை நடைபெறும் இத்தொடரில் இந்தியா சார்பில் 15க்கும் மேற்பட்ட விளையாட்டு பிரிவுகளில் 487 வீரர், வீராங்கனைகள் கலந்து கொண்டுள்ளனர்.

முதல் நாளில் டிரையத்லான் பிரிவில் இந்தியா ஒரு தங்கம் உட்பட 4 பதக்கங்களை அள்ளியுள்ளது.

டிரையத்லான் ஆடவர் பிரிவில் இந்திய வீரர் ஆதர்ஷா சினிமோல் தங்கப் பதக்கம் வென்றார். இவர் பந்தய தூரத்தை 1:02.51 மணி நேரங்களில் கடந்து இலக்கை அடைந்தார். இதன் மூலம் இந்தியாவுக்கு முதல் பதக்கமே தங்கமாக அமைந்தது. இதே போல மற்றொரு இந்திய வீரர் பிஷ்வோர்ஜித் ஸ்ரீகோம் வெள்ளிப் பதக்கம் வென்றார். அவர் பந்தய தூரத்தை 1:02:59 மணி நேரங்களில் கடந்தார்.

இதே போல டிரையத்லான் மகளிர் பிரிவில் இந்தியாவின் தெளடம் சோரோஜினி தேவி வெள்ளிப்பதக்கமும் மோகன் பிராக்ன்யா வெண்கலமும் வென்றனர்.