மதுரைக்கு நேரடியாக குடிநீர் வழங்கும் ’அம்ரூத்’ திட்டம் - முதல்வர் எடப்பாடி பழனிச்சாமி அடிக்கல் நாட்டினார்

மதுரை மாநகராட்சிக்கு முல்லைப் பெரியாறிலிருந்து குடிநீர் கொண்டு வரும் திட்டத்துக்கு, தமிழக முதல்வர் எடப்பாடி பழனிச்சாமி அடிக்கல் நாட்டினார்.

மதுரை மாவட்ட ஆட்சியர் அலுவலகத்தில் இன்று நடைபெற்ற, அம்மாவட்டத்தில் நிறைவுற்ற அரசுத் திட்டங்களின் திறப்பு விழாவில் முதலமைச்சர் எடப்பாடி பழனிச்சாமி கலந்து கொண்டார். அப்போது, மதுரை மாநகராட்சியின் 100 வார்டுகளுக்கு 24 மணி நேரம் குடிநீர் கிடைக்கும் வகையில் அம்ரூத் திட்டத்தை அவர் தொடங்கி வைத்தார். இதன்கீழ் ரூ. 1295.76 கோடி மதிப்பிலான குடிநீர் திட்டம் செயல்படுத்தப்பட உள்ளது. முல்லைப் பெரியாறு அணையில் இருந்து குழாய் மூலம் மதுரைக்கு நேரடியாக குடிநீர் கொண்டுவரப்படவுள்ளது.

இதேபோல், ஆட்சியர் அலுவலகத்தின் புதிய கட்டிடம், மண்டல புற்றுநோய் மையம் உள்ளிட்ட பல நிறைவுற்ற திட்டங்களை தமிழக முதல்வர் திறந்து வைத்தார்.