துணிவு: திரைவிமர்சனம்!

மக்களை ஏமாற்றும் வங்கியின் பணத்தைக் கொள்ளையடித்து மக்களுக்கே கொடுக்கும் நாயகனின் கதையே துணிவு திரைப்படம்.
 

அஜித் – எச். வினோத் கூட்டணியில் உருவாகியிருக்கும் மூன்றாவது படம் என்பதாலும், விஜய் நடித்த வாரிசு படமும் ஒரே நாளில் வெளியாவதாலும் ஏகப்பட்ட எதிர்பார்ப்பு எழுந்தது. அதேபோல், சமீபகாலமாக வரும் படங்களில் ஏதேனும் ஒரு சமூகப் பிரச்னை பேசப்படுவது போல், இந்த படத்திலும் தனியார் வங்கியின் கொள்ளையை ஓரளவு பேச முற்படுகிறது.

 
முதல் பாதி முழுவதும் யூகிக்கக் கூடிய அளவிற்கு இருந்தாலும், அஜித்தின் டான்ஸூம், நீராவ் ஷாவின் ஒளிப்பதிவும் படத்தை ஓரளவு உயிர்ப்புடன் கொண்டு செல்ல உதவுகிறது. இரண்டாம் பாதியில் சொல்லப்படும் அஜித்தின் பின்னணியும், அம்பலமாகும் யுவர் பேங்கின் மோசடியும் படத்தை வேறு ஒரு தளத்திற்கு கொண்டு செல்கிறது.

 
வழக்கம் போல் அஜித் பேசும் பஞ்ச் வசனங்கள் கவனத்தை ஈர்க்கின்றன. “ஆயிரம் ரூபாய் திருடனவன அடிச்சி தோலுரிப்பீங்க…கோடிக்கணக்குல கொள்ளையடிச்சவனுங்கள கண்டுக்க மாட்டீங்க” என காவலர்களை பார்த்து அஜித் பேசும் வசனம் பயங்கர மாஸ். அஜித்துக்கு அடுத்தபடியாக கவனம் ஈர்க்கும் கதாபாத்திரம் மோகன சுந்தரத்துடையது. அவர் வரும் இடங்களில் காமெடிக்கு பஞ்சமில்லை. மஞ்சு வாரியர், சமுத்திரக்கனி, ஜி.எம்.சுந்தர், வீரா, மகாநதி சங்கர் என அனைவரும் கதாபாத்திரத்துக்கு ஏற்ற நடிப்பை வழங்கியுள்ளனர். அஜித் படம் என்றால் படம் முழுவதும் அஜித் மட்டுமே வலம் வருவார். அதுவே இப்படத்திலும் நடக்கிறது.

 

ஜிப்ரான் பின்னணி இசை கைக்கொடுத்த அளவுக்கு அவரின் பாடல்கள் கைக்கொடுக்கவில்லை. படத்தின் சவுண்ட் மிக்ஸிங் பாராட்டத்தக்கது.

படம், அஜீத் ரசிகர்களுக்கு பிடிக்கும். மற்றவர்கள் சற்று மனத் துணிவுடன் தியேட்டர் சென்றால் சமாளிக்கலாம்.