சிலிக்கு புதிய அதிபரான இடதுசாரி இளைஞர்!

தென்னமெரிக்கா நாடான சிலி, 35 வயதான ஓர் இளைஞரை தன் அடுத்த அதிபராக தேர்வு செய்துள்ளது. கேப்ரியல் போரிக் என்ற அந்த இளைஞர் இடதுசாரி செயல்பாட்டாளர் என்பது மிக முக்கியமானது.

சிலியின் வரலாற்றில் மிகவும் இளம் அதிபர் இவரே.  இவரை எதிர்த்து வலதுசாரித் தலைவர் ஒருவர் போட்டியிட்டார். அவர் இரண்டாம் சுற்றிலேயே தோல்வியை ஒப்புக்கொண்டு கேப்ரியலை வாழ்த்தி ட்விட்டரில் செய்தி வெளியிட்டார்.

அடுத்த ஆண்டு மார்ச் முதல் கேப்ரியல் போரிக்கின் பதவிக்காலம் தொடங்கும்.

2011 ஆம் ஆண்டு சட்டக்கல்லூரியில் இறுதி ஆண்டு படித்தபோது போரிக் ஒரு மாணவராக தலைமையேற்று நடத்திய கல்வி தொடர்பான போராட்டம் நாட்டை திணறச் செய்தது. இந்த போராட்டத்தில் கலந்துகொண்ட பல இளைஞர்கள் இப்போதும் போரிக்கின் அதிபர் தேர்தல் பிரச்சாரத்தில் தோள் கொடுத்து பணிபுரிந்துள்ளனர்.

போரிக் அந்த போராட்டத்தை அடுத்து படிப்பை முடிக்காமல் அரசியலில் குதித்து இரு முறை நாட்டு அரசியல் சபைக்குத் தேர்வானார்.

வெற்றி பெற்றதும்,’ நான் சிலியின் அனைத்து குடிமக்களின் அதிபராக செயல்படுவேன்’ என்று சொன்னார் கேப்ரியல் போரிக்.