அரசுப் பள்ளி மாணவர்களின் மருத்துவக் கல்லூரிக் கட்டணத்தை அரசே ஏற்கும்!

தனியார் மருத்துவக் கல்லூரிகள் மற்றும் தனியார் பல்மருத்துவக் கல்லூரிகளில் சேரும், அரசுப் பள்ளி மாணவர்களின் கல்வி, விடுதி கட்டணங்களை தமிழக அரசே ஏற்கும் என முதலமைச்சர் எடப்பாடி பழனிச்சாமி அறிவித்துள்ளார்.

7.5 சதவீத இட ஒதுக்கீட்டின் கீழ் 313 மருத்துவ இடங்களும், 92 பல் மருத்துவத்திற்கான இடங்களும் அரசுப்பள்ளி மாணவர்களுக்கு கிடைத்துள்ளன. அதில் தனியார் கல்லூரிகளில் இடம் கிடைத்தும் கட்டணம் கட்டமுடியாத சூழலில் இருக்கும் மாணவர்களுக்கு உதவும் வகையில், அவர்களுடைய கல்வி கட்டணம் மற்றும் விடுதிக் கட்டணங்களை செலுத்த தமிழக அரசு திட்டமிட்டுள்ளது.  

இதுகுறித்து பேசிய தமிழக முதல்வர், ’ தமிழ்நாடு மருத்துவ சேவைக் கழகத்தில் சுழல் நிதி ஒன்றை உருவாக்க திட்டமிடப்பட்டுள்ளது. இதன் மூலம், மாணவர்கள் கல்விக்கான உதவித்தொகை கிடைக்கும் வரை காத்திராமல், அவர்களுடைய கட்டணத்தை நேரடியாக தமிழக அரசே செலுத்தும். மாணவர்களுக்கு முழு அரசு உதவிக் கிடைக்கும் என தெரிந்தே ஸ்டாலின் மாணவர்களின் கட்டணங்களை ஏற்பது போல் நாடகமாடுகிறார். இது தொடர்பாக கடந்த 18-ஆம் தேதியே நான் அறிவித்திருந்தேன்’ என கூறியுள்ளார்.

முன்னதாக, இன்று காலை தனியார் மருத்துவக் கல்லூரிகளில் சேரும் அரசுப்பள்ளி மாணவர்களின் கட்டணச் செலவை திமுக ஏற்கும் என அக்கட்சியின் தலைவர் மு.க.ஸ்டாலின் அறிவித்திருந்தார்.