நன்றி தலைவா!- அமெரிக்க பங்கு சந்தையில் ரஜினி ரசிகர்!

அமெரிக்கப் பங்குச்சந்தையான நாஸ்டாக்கில் சென்னையில் தொடங்கப்பட்ட ஒரு நிறுவனம் தன் ஐபிஓவை பட்டியலிட்டிருப்பது பலரைத் திரும்பிப் பார்க்க வைத்துள்ளது. இதன் மூலம் எட்டாயிரம் கோடிக்கும் அதிகமாக நிதி திரட்ட இந்நிறுவனம் உத்தேசித்துள்ளது.

 
இந்த  ஐபிஓ வெளியீடு திட்டத்திற்கு ப்ராஜெக்ட் சூப்பர் ஸ்டார் என்று பெயர் வைத்து அனைவரது கவனத்தையும் ஈர்த்துள்ளார் இந்த நிறுவனத்தின் தலைவரான கிரிஷ் மாத்ருபூதம். இவர் ரஜினியின் தீவிர ரசிகராம்!

 
கடந்த 2010ஆம் ஆண்டு திருச்சியை சேர்ந்த கிரிஷ் மாத்ருபூதம் மற்றும் ஷான் கிருஷ்ணசாமி ஆகிய இருவரும்,  மென்பொருள் தொடர்பான சேவையை வழங்கும் ஃபிரஷ்டெஸ்க் என்ற நிறுவனத்தை சென்னையில் தொடங்கினர்.  2017ஆம் ஆண்டு நிறுவனத்தின் பெயர் ஃபிரஷ் ஒர்க்ஸ் என்று மாற்றிய நிலையில்,  அமெரிக்க பங்குச்சந்தையில் இடம் பிடிக்க வேண்டும் என்பதற்காக நிறுவனத்தை கலிஃபோர்னியாவிற்கு  நகர்த்தினர்.

 
அதனைத் தொடர்ந்துதான் இந்த ஐபிஓ வெளியீடு.

 
‘இந்தத் திட்டத்திற்கு சூப்பர் ஸ்டார் என்று பெயர் வைத்ததன் மூலம் என்னுடைய மானசீக குரு ரஜினி சாருக்கு நன்றி தெரிவிக்க விரும்புகிறேன்.

 
மேலும் அவர் மீது எனக்கு உள்ள அன்பையும் வெளிப்படுத்த விரும்புகிறேன். அவர் தான் என்னுடைய வாழும் ரோல்மாடல். சூப்பர் ஸ்டாரை உலகெங்கும் உள்ள பல லட்சம் ரசிகர்கள் போற்றி பாராட்டு வருகின்றனர். அந்த வகையில் எனக்கு ஒரு நல்ல ரோல்மாடலாக இருப்பவரின் பெயரை வைப்பதில் எனக்கு மகிழ்ச்சி. நன்றி தலைவா’ என மாத்ருபூதம் கூறியுள்ளார்.

 
2021ஆம் ஆண்டு ஃபிரஷ் ஒர்க்ஸ் நிறுவனத்தின் வருமானம் கடந்த ஜூன் 30ஆம் தேதி வரை 168.9 மில்லியன் டாலர் என்று கூறப்படுகிறது. இது கடந்த ஆண்டு  110.5 மில்லியன் டாலராக இருந்துள்ளது.

 
இந்த ஐபிஓ வெளியீடு ஒரே நாளில் தன்னுடைய முதலீட்டாளர்களுக்கு 32 சதவீத வருவாயை ஈட்டித்தந்துள்ளது. சாதாரணமாக 2010-இல் 700 அடி அலுவலகத்தில் தொடங்கி மாபெரும் வெற்றி பெற்றுள்ள தொழில் நிறுவனத்தைக் கட்டமைத்துள்ளார் இந்த தமிழர்.