டெல்லியில் மாநிலங்களவையில் அதிகம் ஒலிக்கும் மொழிகளின் வரிசையில் தமிழின் இடம் எது?

மாநிலங்களவையில் அதிகம் பயன்படுத்தப்பட்ட மொழிகளின் பட்டியலில் தமிழ் நான்காவது இடத்தில் உள்ளது. இது 2019 – 2020 ஆம் ஆண்டின் புள்ளிவிவரம். கடந்த 2004 முதல் 2017 வரையிலான காலகட்டத்துடன் ஒப்பிடுகையில் சென்ற ஆண்டில் இந்தி, ஆங்கிலம் தவிர்த்து மற்ற பிராந்திய மொழிகளில் சபை உறுப்பினர்கள் அதிகமாகவே உரை நிகழ்த்தியிருக்கிறார்கள்.

மாநிலங்களவையில் அதிகம் பயன்படுத்தப்பட்ட மொழிகளின் பட்டியலில் முதலிடத்தில் இந்தி, இரண்டாம் இடத்தில் தெலுங்கு, மூன்றாமிடத்தில் உருது, நான்காமிடத்தில் தமிழ் இருக்கின்றன. ஐந்தாமிடத்தில் இருப்பது சமஸ்கிருதம்! 2019 – 2020 ஆம் ஆண்டில் 12 முறை சமஸ்கிருதத்தில் குறுக்கீட்டு உரைகள் நிகழ்த்தப்பட்டுள்ளன.

மாநிலங்களவை சபாநாயகர் வெங்கய்ய நாயுடு எப்போதும் அவர்களது தாய்மொழியில் உரையாற்றும்படி உறுப்பினர்களை வலியுறுத்துகிறார். நாடாளுமன்றத்தின் கூட்டாட்சி தத்துவத்தை உறுதி செய்வதற்காக அவர் இதனை செய்கிறார். இந்திய பட்டியல் மொழிகள் 22-இலும் உரை நடக்கும்போதே மொழிபெயர்ப்புக்கும் வசதிகளை கடந்த 2018 ஜூலையில் ஏற்படுத்திய அவர் பத்து மொழிகளில் அவையில் பேசவும் செய்தார் என அதிகாரிகள் தெரிவித்துள்ளனர்.

ராஜ்ய சபா தொடங்கப்பட்ட 1952-இல் இருந்து கடந்த 2018, 2020 ஆண்டுகளில் தான் டோக்ரி, கஷ்மீரி, கொங்கனி மற்றும் சந்தாலி ஆகிய மொழிகள் முதன்முறையாக அவையில் பேசப்பட்டுள்ளன. அசாமீஸ், போடோ, குஜராத்தி, மைத்திலி, மணிப்பூரி மற்றும் நேப்பாளி ஆகிய மொழிகள் நீண்ட கால இடைவெளிக்கு பிறகு அவையில் பயன்படுத்தப்பட்டிருக்கின்றன.

உறுப்பினர்கள் இந்தி, ஆங்கிலம் ஆகிய மொழிகள் பேசுவதற்கே முக்கியத்துவம் அளித்து வந்த சூழலில், மற்ற 21 மொழிகளில் பேசுவதற்கு கடந்த 16 ஆண்டுகளாகவே கவனம் செலுத்தி வருகின்றனர். இதனால் ஏனைய மொழிகளின் பயன்பாடு அவையில் ஐந்து மடங்கு அதிகரித்திருக்கிறது.

2004 - 2017 காலகட்டத்தை ஒப்பிடும்போது இந்தி அல்லாத பிற மொழிகளின் பயன்பாடு ஐந்து மடங்கு 2020-ஆம் ஆண்டு மட்டும் அதிகரித்துள்ளதாக அதிகாரிகள் கூறி உள்ளனர்.