'அவசரத்தில் செய்துவிட்டேன்' - சந்தோஷ் பி.ஜெயக்குமார் வருத்தம்

'இரண்டாம் குத்து' திரைப்படத்தின் போஸ்டரை விமர்சித்ததற்காக பாரதிராஜாவின் 'டிக் டிக் டிக்' படத்தில் இடம்பெற்ற புகைப்படத்தை வெளியிட்டு பரபரப்பை கிளப்பிய சந்தோஷ் பி.ஜெயக்குமார் தனது செயலுக்காக வருத்தம் தெரிவித்துள்ளார்.


'இரண்டாம் குத்து' போஸ்டரை கண்டித்து இயக்குநர் இமயம் அறிக்கை வெளியிட்டதற்கு பதிலளிக்கும் வகையில் "இதைப் பார்த்துக் கூசாத கண்ணு, இப்போது கூசிருச்சோ..?" என  'டிக் டிக் டிக்' படத்தின் புகைப்படத்தை வைத்து சந்தோஷ் பி.ஜெயக்குமார் ட்வீட் செய்தார்.

இந்நிலையில் அதற்கு வருத்தம் தெரிவித்து சந்தோஷ் பி.ஜெயக்குமார் வெளியிட்டுள்ள அறிக்கையில், "இரண்டாம் குத்து' படத்தை இயக்கி, நடித்துள்ளேன். அதன் போஸ்டர்கள், டீஸருக்கு இயக்குநர் பாரதிராஜா எதிர்ப்புத் தெரிவித்து அறிக்கை ஒன்றை வெளியிட்டார். அந்த அறிக்கையை படித்துவிட்டு வந்த கணத்தின் வெப்பத்தில், எனது ட்விட்டர் பதிவில் ஒரு ட்வீட் போட்டுவிட்டேன். அது அவசரத்தில் என்ன செய்கிறோம் என்று தெரியாமல் செய்தது. அதற்குப் பிறகு நாம் அவசரத்தில் இதைச் செய்திருக்கக் கூடாது என்று மனம் கூறியது. ஆகவே, நான் போட்ட ட்வீட்டிற்கு வருத்தம் தெரிவிக்கிறேன்.

தமிழ்த் திரையுலகின் மூத்த இயக்குநர் பாரதிராஜா. அவருடைய சாதனைகளில் 1 சதவீதமாவது நாம் செய்துவிட மாட்டோமா என்று பலரும் பணிபுரிந்து வருகிறார்கள். பல்வேறு இயக்குநர்களுக்கு இயக்குநர் பாரதிராஜா வழிகாட்டியாக இருந்திருக்கிறார், இருக்கிறார், எப்போதும் இருப்பார். அவருடைய அறிக்கைக்கு நான் அவ்வாறு எதிர்வினையாற்றி இருக்கக்கூடாது.

இதற்கு அடுத்து வரும் போஸ்டர்கள், அனைத்துத் தரப்பு மக்களும் பார்க்கும் வகையில் இருக்கும் என்று உறுதியளிக்கிறேன்" என்று அவர் கூறியுள்ளார்.