இலங்கை பிரதமர் ரணில் விக்ரமசிங்க இந்தியா வருகை

இலங்கை பிரதமர் ரணில் விக்ரமசிங்க 3 நாள் பயணமாக வரும் 14-ஆம் தேதி இந்தியா வருகிறார். பிரதமரான பின் அவர் மேற்கொள்ளும் முதல் வெளிநாட்டுப் பயணம் இதுவாகும். இந்த பயணத்தின்போது, குடியரசுத் தலைவர் பிரணாப் முகர்ஜி, பிரதமர் நரேந்திர மோடி, வெளியுறவுத்துறை அமைச்சர் சுஷ்மா ஸ்வராஜ், பாதுகாப்புத்துறை அமைச்சர் மனோகர் பரிக்கர் உள்ளிட்டோரை சந்தித்து ரணில் விக்ரமசிங்க பேச்சுவார்த்தை நடத்துகிறார்.

அப்போது, இரு நாடுகளுக்கு இடையேயான மீனவர் பிரச்னை குறித்தும், பொருளாதார ஒத்துழைப்பு உள்ளிட்ட பிற விவகாரங்கள் பற்றியும் தலைவர்கள் ஆலோசிப்பார்கள் என எதிர்பார்க்கப்படுகிறது. இலங்கை பிரதமர் ரணிலுடன், அந்நாட்டு வெளியுறவுத்துறை அமைச்சர் மங்கள சமரவீரவும் இந்தியா வருகிறார். கடல் எல்லையைத் தாண்டும் இந்திய மீனவர்கள் சுட்டுக்கொல்லப்படுவார்கள் என கடந்த மார்ச் மாதம் இலங்கை பிரதமர் ரணில் விக்ரமசிங்க கூறியிருந்தார். இந்த சூழலில் அவர் இந்தியா வருவது மிகுந்த எதிர்பார்ப்பை ஏற்படுத்தியுள்ளது.