பெண்களுக்கெதிரான வன்முறைகளைக் கண்டித்து காங்கிரஸ் தர்ணா!

தாழ்த்தப்பட்டோர் மற்றும் பெண்களுக்கு எதிராக நிகழ்த்தப்படும் வன்முறைகளைக் கண்டித்து மாநில அளவில் காங்கிரஸ் சார்பில் தர்ணா நடத்தப் போவதாக, அகில இந்திய காங்கிரஸ் கமிட்டி  செயலாளர் சஞ்சய் தத் தெரிவித்துள்ளார்.

திருச்சி மாவட்ட காங்கிரஸ் அலுவலகத்தில்  மத்திய அரசின் வேளாண் சட்டங்களுக்கு எதிரான கையெழுத்து பெறும் இயக்கத்தை சஞ்சய் தத் தொடங்கி வைத்தார்.

அதன்பின் செய்தியாளர்களை சந்தித்த அவர், ’காங்கிரஸ் கட்சியின் இந்த கையெழுத்து இயக்கத்துக்கு விவசாயிகள், விவசாயத் தொழிலாளர்கள் மட்டுமின்றி அனைத்துத் தரப்பு மக்களிடம் இருந்தும் நல்ல வரவேற்பு கிடைத்துள்ளது. மத்திய அரசு தொடர்ந்து மக்கள் விரோத போக்கை கடைபிடித்து வருகிறது.  

தமிழ்நாட்டு மக்களின் உணர்வுகளுக்கு மதிப்பளிக்காமல், பெண்ணுக்கு எதிரான மோசமான செய்கையில்  ஈடுபட்ட நபரை மதுரை எய்ம்ஸ் மருத்துவமனை நிர்வாகக் குழு உறுப்பினராக மத்திய அரசு நியமித்துள்ளது.

தமிழ்நாடு  மற்றும் பாஜக ஆளும்  மாநிலங்களில் தாழ்த்தப்பட்ட மக்களுக்கும், பெண்களுக்கும் எதிரான வன்முறைகள் தொடர்ந்து அதிகரித்து வருகிறது. எனவே, இதைக் கண்டித்து தமிழ்நாடு காங்கிரஸ் சார்பில் நவ.9-ம் தேதி முதல் மாநிலம் முழுவதும் தர்ணா நடத்தப்படும்." என  தெரிவித்தார்.