ஓடிடியில் 13+, 16+, Adult என திரைப்படங்களை வகைப்படுத்த வேண்டும்: மத்திய அரசு விதிமுறை

பதற்றம் மற்றும் வன்முறையைத் தூண்டுவதுபோல் தவறான தகவல்கள் சமூக வலைதளங்களில் வெளியானால், தொடர்புடைய நிறுவனங்களுக்கு 5 ஆண்டுகள் சிறை தண்டனை வழங்கப்படும் என மத்திய அரசு அறிவித்துள்ளது.

OTT தளங்கள் மற்றும் சமூக வலைதள விதிமுறைகள் தொடர்பாக மத்திய அமைச்சர்கள் பிரகாஷ் ஜவடேகர் மற்றும் ரவிசங்கர் பிரசாத் ஆகியோர் டெல்லியில் செய்தியாளளை சந்தித்தனர். அப்போது, வலைதளங்களைப் பயன்படுத்துவோர் அவதூறு பரப்புவதையும் வதந்தி பரப்புவதையும், வன்முறையைத் தூண்டுவதையும் ஏற்க முடியாது எனத் தெரிவித்தனர். காதலித்தபோது எடுத்த அந்தரங்க புகைப்படங்களை பிரிவுக்குப் பின்னர் பகிர்வது, தீவிரவாதம், வன்முறை ஆகியவை சமூக வலை தளங்களில் சர்வ சாதாரணமாக அரங்கேறுவதாக அமைச்சர்கள் தெரிவித்தனர்.

இந்தியாவில் வாட்ஸ் அப் பயன்படுத்துவோர் எண்ணிக்கை 53 கோடியாகவும், இன்ஸ்டக்ராம் 21 கோடியாகவும், பேஸ்புக் 41 கோடியாகவும் உள்ளது எனக் கூறிய அமைச்சர்கள், பெண்கள் குறித்த ஆபாசப் புகைப்படங்கள், அந்தரங்க புகைப்படங்கள் மற்றும் தகவல்கள், புகார் அளிக்கப்பட்ட  24 மணி நேரத்துக்குள் சமூக வலைத்தளங்களில் இருந்து அகற்றப்பட வேண்டும் என வலியுறுத்தியுள்ளனர்.

தவறான ஆட்களின் சமூக வலைதள கணக்கு விவரம், புகார்கள் தொடர்பாக அரசோ அல்லது நீதிமன்றமோ தகவல் கேட்டால், தொடர்புடைய நிறுவனங்கள் உடனடியாகத் தகவல் வழங்க வேண்டும் என மத்திய அரசு உத்தரவு பிறப்பித்துள்ளதாகவும் அமைச்சர்கள் தெரிவித்தனர்.

தவறான தகவல்களை பரப்ப கூடிய முதல் நபர் யார்? என்ற விவரத்தை சமூக வலைதளங்கள் கட்டாயம் கண்டறிய வேண்டும் எனவும், அது தொடர்பான தகவல்களை எப்போதும் தயாராக வைத்திருக்க வேண்டும் எனவும் கூறிய அமைச்சர்கள்,  பதற்றம் மற்றும் வன்முறையைத் தூண்டுவதுபோல் தவறான தகவல்கள் சமூக வலைதளங்களில் வெளியானால், தொடர்புடைய நிறுவனங்களுக்கு 5 ஆண்டுகள் சிறை தண்டனை வழங்கப்படும் எனவும் தெரிவித்துள்ளனர்.