புது நாவல் வரிசை: 9 - வசந்தத்தைத் தேடி

அரசியல் செயல்பாடு, களப்பணி மூலம்  அறியப்பட்டவர் சாலமன். இவர் புதிதாக எழுதியுள்ள நாவலான ‘வசந்தத்தைத் தேடி’ சிந்தன் புக்ஸ் வெளியீடாக வரவுள்ளது. இது இவருடைய முதல் இலக்கியப் படைப்பாகும்.

 நாவலின் கதைக்களம் என்ன என்பது குறித்து சாலமனிடம் கேட்டோம்.
 
“சாதியாகப் பிரிந்து கிடக்கிற இந்திய சமூகங்களைப் பற்றிய கதை தான்  ‘வசந்தத்தைத் தேடி’ நாவல். கூவம் ஆற்றின் தலைமடையில் உள்ள கிராமம் தான் நாவலின் கதைக்களம்.
 
இந்தியாவில் சாதியாகப் பிரிந்து கிடக்கிற மக்கள் சில உரிமை சார்ந்த போராட்டங்களுக்காக ஒன்றாகக் கூடுகின்றனர். ஆனால், அவர்கள் ஆத்மார்த்தமாக ஒன்று சேர்வதில்லை. தங்களை உழைப்பாளியாக உணர்ந்து ஒரு வர்க்கமாகத் திரளவேண்டும். அப்படித் திரளும் போது தான் தொழிலாளி ஜனநாயகவயப்பட முடியும். அந்த இடத்தில் சாதி ஒழிப்பின் முக்கியத்துவத்தை வலியுறுத்துவது தான் ‘வசந்தத்தைத் தேடி’.

சாதி ஒழிந்தால் தான் வர்க்கமாகத் திரள முடியும். அதற்கான கதைக்களத்தைத் தேடும் போது தான் ‘வசந்தத்தைத் தேடி’நாவல் உருவானது.

சாதி தவறு என உணர்ந்து, ஊர் தெரு சேரித் தெருவோடு சேர்ந்து, வேறு ஒரு பகை சக்தியை எதிர்க்கும் போது, இந்த அரசு அவர்களை எப்படி அணுகுகிறது? இந்த அரசு அப்பொழுது யாருக்கானதாக செயல்படுகிறது என்பதை வசந்தத்தைத் தேடி உணர்த்தும்.

இந்த நாவல் சாதியம் கெட்டித் தட்டிக் கிடக்கிற ஊர் தெருவையும், கொடிய உழைப்புச் சுரண்டல் மட்டுமே நோக்கமாகக் கொண்ட அந்நிய தொழிற்சாலைகளையும் விளக்கி, இரண்டிலும் உள்ள உழைப்போரும் சாதி ஒழிப்பை ஏன் முன்னிறுத்த வேண்டும் என்பதையும் சாதி ஒழிப்பிற்கும் ஏகாதிபத்திய எதிர்ப்புக்கும் என்ன தொடர்பு என்பதையும் சுட்டிக்காட்டும்.
 
நாவலின் தலைப்பான ‘வசந்தத்தைத் தேடி’ என்பது குறியீடு தானே தவிர, அதனுடைய உள்ளீடாக இருப்பது இந்திய மானுடத்தின் விடுதலையைத் தேடுவதுதான்.” என்கிறார் சாலமன்.

நாவல்: வசந்தத்தைத் தேடி                                                                                                     
ஆசிரியர்: சாலமன்                                                                                                                    
பதிப்பகம்: சிந்தன் புக்ஸ்                                                                                                       
விலை: ரூ.220

தா.பிரகாஷ்