???????? - Andhimazhai.com - Andhimazhai - Web Portal for tamils
 
 
 
Andhimazhai - headlines, Tamil Latest News 0 சிறுகோட்டுப் பெரும்பழம் : நாஞ்சில்நாடன்! 0 வாடகை வீட்டுப்புராணம் : வெத்தலைக்காரம்மா வீடு - ஒளிப்பதிவாளர் வைட் ஆங்கிள் ரவிசங்கரன்! 0 உலகக் கோப்பை கால்பந்து: கோஸ்டோரிகாவை பந்தாடியது பிரேசில் 0 உச்ச நீதிமன்ற தலைமை நீதிபதி செல்லமேஸ்வரர் ஓய்வு பெற்றார்! 0 பாஜகவின் பிரதிநிதியாக ஆளுநர் செயல்படுகிறார்: ஸ்டாலின் காட்டம்! 0 கேரளத்தை பிரதமர் தொடர்ந்து புறக்கணிக்கிறார்: பினராயி விஜயன் குற்றச்சாட்டு 0 தென் கொரிய முன்னாள் பிரதமர் கிம் ஜாங் பில் மறைவு 0 வன்முறையை தூண்டும் வகையில் பேட்டி: பாரதிராஜா மீது வழக்கு பதிவு 0 காவிரி மேலாண்மை ஆணையத்தின் தலைவராக மசூத் ஹுசைன் நியமனம்! 0 அடுத்த ஆண்டு முதல் நீட் தேர்வுகளை அந்தந்த மாவட்டங்களிலேயே எழுதலாம்: பிரகாஷ் ஜவடேகர் 0 திமுகவினர் கைதை கண்டித்து போராட்டம் நடத்திய மு.க.ஸ்டாலின் கைது! 0 2021க்கு முன்பு தேர்தல் சட்டமன்ற தேர்தல் வராது: ஜெயக்குமார் பேச்சு 0 டெல்லியில் கேரள முதல்வர் போராட்டம் 0 நாட்டிற்கு நல்லது நடப்பதை ஸ்டாலின் விரும்பவில்லை: தமிழிசை கருத்து 0 ஆளுநர் கார் மீது கருப்புக் கொடி வீசிய தி.மு.க.வினர் 192 பேர் கைது!
Feed Facebook Twitter
 
முகப்பு | செய்திகள் | கேலரி | சினிமா | சிறப்புப் பகுதி | இதழ் | பத்தி
Andhimazhai Magazine Subscription
 

எழுத்தாளனுக்கு தமிழ்நாட்டைத் தவிர்த்து வேறு எந்த ஊருக்குப் போனாலும் மதிப்பு இருக்கிறது!

Posted : செவ்வாய்க்கிழமை,   ஏப்ரல்   17 , 2018  03:07:38 IST


Andhimazhai Image
தமிழின் மூத்த படைப்பாளர் மா.அரங்கநாதன் நினைவு இலக்கிய விருதுகள் வழங்கும் விழா நேற்று மாலை மியூசிக் அகாதமி சிற்றரங்கில் இனிதே நடந்தது. வலிவலம் ஆர்.எஸ்.வெங்கட்ராமன் இறை வணக்கப் பாடலுடன் தொடங்கிய இந்த விழாவில் இயக்குநர் அருண்மொழி, பக்ருதின் குழுவினர் சார்பில் மா.அரங்கநாதன் கதைகளைத் தழுவிய நாடகம் நிகழ்த்தப்பட்டது. விருது குறித்து கவிஞர் ராஜகோபாலன் அறிமுக உரையாற்றினார்.
 
 
பின்னர் எஸ். சண்முகம் மற்றும் கவிஞர் ரவி சுப்ரமணியன் இருவருக்கும் மா.அரங்கநாதன் விருது [தலா ரூபாய் ஒரு லட்சம் ரொக்கப் பணமும், மா.ரங்கநாதன் நினைவுச்  சிற்பமும் அடங்கிய] வழங்கப்பட்டது. தினமணி ஆசிரியர் வைத்தியநாதன் விருதுகள் வழங்கி சிறப்பித்தார்.
 
 
இதைத் தொடர்ந்து விருது பெரும் விமர்சகர், மொழிபெயர்ப்பாளர் எஸ்.சண்முகம் குறித்து ஜமாலன் பேசினார். தமிழில் புதுமைப்பித்தனுக்குப் பிறகு தனித்துவமான கதைகளை எழுதியவர் மா.அரங்கநாதன் என்று தொடங்கிய ஜமாலன், புத்தக வாசிப்பில் சண்முகத்திற்கு இருக்கும் ஆர்வம், அவரது புத்தகச் சேகரிப்பு, விமர்சன ஆக்கங்கள், மொழிபெயர்ப்பு மற்றும் அவரது இலக்கிய வாழ்வு என எஸ்.சண்முகம் உடனான தனது முப்பது வருட கால நட்பை உரையில் வெளிப்படுத்தினார்.
 
 
ரவி சுப்ரமணியத்துடனான எண்பதுகளில் தொடங்கிய நட்பை நினைவு கூர்ந்து தன் பேச்சைத் தொடங்கிய ஆவணப்பட இயக்குநர் பாரதி கிருஷ்ணகுமார், ரவி சுப்ரமணியத்துடனான முதல் சந்திப்பு, அதன் பிறகு அவரது இலக்கியம் குறித்தான பேச்சுகள், ரவி இல்லத்து உணவு உபசரிப்பு என சகலத்தையும் நெகிழ்ச்சியுடன் நினைவு கூர்ந்தார். அந்த ருசியின் மணம்தான் எங்களது நட்பின் மனம் என்றார் கிருஷ்ணகுமார். ’’தகுதி வாய்ந்தவர்களுக்கு, தகுதி வாய்ந்தவர்களால் அளிக்கப்படும் இந்த விருது ஒரு முன்மாதிரியாகத் திகழப்போகும் ஒன்று. இது ஒரு மங்களகரமான விருது. படைப்பு ரீதியாகவும் பண்பு ரீதியாகவும் உயர்ந்த மனிதர் ரவி சுப்ரமணியன். குடும்பங்கள் எழுதுபவரைக் கொண்டாடுவதில்லை. எழுத்து சோறு போடுகிற விஷயமாக இன்னும் தமிழில் மாறவில்லை. எழுத்தாளனுக்கு தமிழ்நாட்டைத் தவிர்த்து வேறு எந்த ஊருக்கு அல்லது தேசத்துக்குப் போனாலும் மதிப்பு இருக்கிறது. அங்கே எழுத்தாளனைக் கொண்டாடுகிறார்கள்’’ என நகைச்சுவை தெறிக்கும் பேச்சால் அரங்கைக் கட்டிப்போட்டார் பாரதி கிருஷ்ணகுமார். ரவியுடனான நட்பை Fragrance of Love என்று கூறி உணர்ச்சிவசப்பட்ட பாரதி கிருஷ்ணகுமார் ரவி சுப்ரமணியனின் ’பரண்’ என்னும் கவிதையை வாசித்து மிகுந்த நெகிழ்வுடனும் மகிழ்வுடனும் உரையை நிறைவு செய்தார்.    
 
 
பின்னர் விருதுகள் அளித்து சிறப்புரை ஆற்றிய தினமணி ஆசிரியர் வைத்தியநாதன் நீதித்துறை சார்ந்தவர்கள் தமிழுக்கு ஆற்றியிருக்கும் பணிகள் பற்றி ஒரு ஆழமானதொரு உரையை வழங்கினார். நீதியரசர் மஹாதேவன் தனது தந்தையார் மா.அரங்கநாதன் பெயரால் உருவாக்கியிருக்கும் இந்த விருது சாகித்ய அகாதமி விருதுக்கு நிகராக தமிழில் மதிக்கப்படும் காலம் வெகுவிரைவில் வரும் என்று ஆரூடம் கூறினார். சிறந்த படைப்பாளிகளை தேர்ந்தெடுத்து விருதளித்து கௌரவிக்கும் பணியைத் தொடங்கியிருக்கும் நீதியரசர் மஹாதேவனுக்கு நன்றி கூறி உரையை முடித்தார்.
 
 
மா. அரங்கநாதன் குறித்த சிறப்பானதொரு நினைவுரையை எழுத்தாளர் சோ.தர்மன் ஆற்றினார்.  பின்னர் ரவி சுப்ரமணியன் தனது ஏற்புரையை வழங்கினார். தனது பள்ளி ஆசிரியர்கள், இளமைக்காலம், இலக்கிய வாசிப்பு தந்த ருசி, தனது குடும்ப நினைவுகள், சென்னைக்கு இடம்பெயர்ந்த வாழ்க்கை, ஆவணப்பட இயக்குநராக தன் பயணம், இலக்கிய நண்பர்கள் என அனைவரையும் நன்றியுடனும் நெகிழ்ச்சியுடனும் நினைவு கூர்ந்தார் ரவி சுப்ரமணியன். சிறியதோர் உரை என்றாலும் செறிவானதொரு உரையைத் தந்தார் விமர்சகர் எஸ்.சண்முகம். மா.அரங்கநாதன் கதைகளின் இரு வேறு கலாச்சார நிலைகள், அதன் முரண்பாடுகள், வைதீக மரபுக்கு மாற்றாக அரங்கநாதன் எழுதிக்காட்டிய அவைதீக மரபின் தத்துவ சாரம் வெளிப்பட்ட கதைகள், ஜேம்ஸ் டீனும் செண்பகராமன் புதூரும், காடன் மலை, மைலாப்பூர், கேணி, உவரி என தமிழ் மரபின் ஆழமான தத்துவ அறவியல் பேசும் அரங்கநாதன் கதைகளை பேச்சில் விதந்தோதினார். தனது ஆசிரியர் தமிழவனுக்கும், இலக்கிய நண்பர்களுக்கும் பேச்சில் நன்றி கூறி தனது உரையை முடித்தார் எஸ். சண்முகம்.
 
 
விழாவைச் சிறப்புறத் தொகுத்து வழங்கினார் கவிஞர் அகர முதல்வன். விழாவின் தமிழின் மூத்த படைப்பாளிகள், பதிப்பாளர்கள், நீதிபதிகள் வைத்தியநாதன், பி.என்.பிரகாஷ், சுப்பராயன், புஷ்பா சத்தியநாராயணன், மதுரை உயர்நீதிமன்ற நீதிபதி கோவிந்தராஜ், சத்ய மூர்த்தி, இறையன்பு ஐ.ஏ.எஸ், இயக்குநர் மிஷ்கின் ஆகியோர் கலந்துகொண்டார்கள்.
 
 
விழாவின் நன்றியுரையை மா.அரங்கநாதனின் மைலாப்பூர் சிறுகதையை முன்வைத்துப் பேசி அதன் நுட்பங்களை வியந்து, தமிழின் மூத்த படைப்பாளி மா.அரங்கநாதனின் சிறுகதை சாதனைகளை தமிழ்கூறும் நல்லுலகம் உணர வேண்டும் என முத்தாய்ப்பாகக் கூறி அனைவருக்கும் நெகிழ்ச்சி கலந்த நன்றியுரையாற்றி முடித்தார் ஆர்.தேவராஜன்.
 
 
- சரோ லாமா -


click here
 

 

Print

 

கேலரி
புகைப்படத்தொகுப்பு -
மேலும்...