எனக்கு பெயர் கொடுத்தவர் கருப்பு கருணா! - ஆதவன் தீட்சண்யா உருக்கம்

தனது கொள்கையில் எந்த சமரசமும் செய்துகொள்ளாமல் இறுதிவரை உறுதியாக இருந்தவர் கருப்பு கருணா. அதைப்போலவே அவரது இறப்பிலும் எந்த சடங்குகளுமின்றி, அவரது உடல் மருத்துவமனைக்கு வழங்கப்பட்டது என எழுத்தாளர் ஆதவன் தீட்சண்யா தெரிவித்துள்ளார்.

த.மு.எ.க.ச துணைப் பொதுச்செயலாளர் கருப்பு கருணா கடந்த வாரம் மறைந்த நிலையில் அவரது நினைவேந்தல் கூட்டம் சென்னை எழும்பூர் இக்சா மையத்தில் நேற்று (31.12.2020) நடைபெற்றது. இதில் எடிட்டர் பி. லெனின், எழுத்தாளர் ஆதவன் தீட்சண்யா, வழக்கறிஞர் சிகரம் செந்தில்நாதன், நாடகவியலாளர் பிரளயன், சி.பி.எம் மாநில செயற்குழு உறுப்பினர் கனகராஜ், இயக்குநர் ராஜூமுருகன், இயக்குநர் அஜயன் பாலா உள்ளிட்ட பலர் கலந்துகொண்டனர்.

அப்போது பேசிய எழுத்தாளர் ஆதவன் தீட்சண்யா, "எனக்கு 'தீட்சண்யா' என்ற பெயரை வழங்கியவர் கருணா தான். அவர் நடத்திய தீட்சண்யா பத்திரிகையில் இருந்து தான் என் மகளுக்கு அப்பெயரை சூட்டினேன். அதிலிருந்தே என் பெயரிலும் தீட்சண்யா சேர்ந்தது. கருணா அடிக்கடி நகைச்சுவையாக சொல்வார். "பெற்றது நீயாக இருக்கலாம், பெயர் நான் கொடுத்தது பாதி உரிமை எனக்கும் இருக்கிறது" என்பார் அவர்.

சுயவாழ்க்கையில் சடங்கு சம்பிரதாயங்களில் மூழ்கி கிடந்துவிட்டு, மேடையில் மைக்குக்கு முன்னால் மட்டும் பலர் உலக அரசிலையே பேசுவார்கள். ஆனால் கருணா அப்படியானவர் அல்ல. அவர் சுயவாழ்விலும் பொதுவாழ்விலும் கொண்ட கொள்கையிலிருந்து இறுதிவரை வழுவாமல் இருந்தார். அவரது திருமணம் கூட மாலை நேரத்தில் மிக எளிமையாக நடந்தது.

கருணா இறந்தபிறகு அவரது உடலை எந்த சடங்குகளுக்கும் உட்படுத்தாமல் மருத்துவமனைக்கு தானமாக வழங்க வேண்டுமென்ற கருணாவின் விருப்பத்தை எந்த மாற்றமும் இல்லாமல் அவரது குடும்பத்தினர் நிறைவேற்றியிருக்கிறார்கள்.

நாம் எல்லோரும் வாழும்போது கொள்கையில் உறுதியாக இருக்கிறோம். ஆனால் இறப்புக்கு பின்னர் குடும்பத்தினர் அவரகளது தலையீட்டால் சடங்கு சம்பிரதாயங்களை நம் மீது திணித்துவிட வாய்ப்பிருக்கிறது. சொத்துக்காக உயில் எழுதுகிறோம். அதேபோல் நாம் கொண்ட கொள்கையின் வழியில் நமது இறுதி நிகழ்வுகளும் நடக்க வேண்டுமென உயில் எழுதுவோம், தவறில்லை. இறப்புக்கு பின்னரும் நமது கொள்கையை பெருமிதப்படுத்த தவறிவிடக்கூடாது" என்று கூறினார்.