2021 - 2022 ஆண்டுக்கான தமிழக இடைக்கால பட்ஜெட்டை சட்டப்பேரவையில் துணை முதலமைச்சரும், நிதியமைச்சருமான ஓ.பன்னீர்செல்வம் இன்று தாக்கல் செய்தார். இந்த இடைக்கால பட்ஜெட்டை புறக்கணித்து திமுக வெளிநடப்பு செய்துள்ளது.
இந்த ஆண்டுக்கான முதல் சட்டப்பேரவைக் கூட்டத் தொடர், ஆளுநர் உரையுடன் கடந்த 2-ம் தேதி தொடங்கி நடைபெற்றது. இதனைத் தொடர்ந்து, பட்ஜெட் கூட்டத் தொடர் இன்று தொடங்குகிறது. சென்னையில் உள்ள கலைவாணர் அரங்கில் நடைபெறும் இந்தத் தொடரில் காலை 11 மணிக்கு, அடுத்த நிதியாண்டுக்கான பட்ஜெட்டை துணை முதலமைச்சரும், நிதியமைச்சருமான ஓ.பன்னீர்செல்வம் தாக்கல் செய்தார்.
சட்டப்பேரவைக்கு தேர்தல் நடைபெற உள்ளதால், மூன்று மாத கால செலவினத்துக்காக இடைக்கால பட்ஜெட்டாகவே இந்த நிதிநிலை அறிக்கை தாக்கல் செய்யப்பட்டுள்ளது. கடந்த 2011-ஆம் ஆண்டில் ஜெயலலிதா தலைமையில் அதிமுக அரசு பொறுப்பேற்றபோது ஒரு லட்சம் கோடியாக இருந்த தமிழக அரசின் கடன், 4 லட்சத்து 56 ஆயிரத்து 660 கோடியாக அதிகரித்துள்ளதாக கடந்த ஆண்டு நிதிநிலை அறிக்கையில் தெரிவிக்கப்பட்டது.
இந்த நிலையில் இடைக்கால நிதிநிலை அறிக்கை தாக்கல் செய்யப்படுகிறது. திமுக ஆட்சியில் தமிழகம் உபரி நிதி மாநிலமாக இருந்தாக தெரிவித்துள்ள அக்கட்சியின் சட்டமன்ற உறுப்பினர் பி.டி.ஆர். பழனிவேல் தியாகராஜன், தமிழக வரலாற்றிலேயே அதிக கடனை வாங்கி வட்டி கட்டிய அரசாக எடப்பாடி பழனிசாமி அரசு உள்ளதாக கடுமையாக சாடியுள்ளார்.
