தன்னை அறைவதற்காக ஆள் அமர்த்திய தொழிலதிபர்!

முகநூலைப் பயன்படுத்தும் போதெல்லாம் தன்னை கன்னத்தில் அறைவதற்காகவே, இளம் பெண் ஒருவரை பணி அமர்த்தியிருக்கிறார் மனீஷ் சேதி என்ற தொழிலதிபர். இந்த வேலைக்கு எவ்வளவு சம்பளம் தெரியுமா? ஒரு மணி நேரத்திற்கு இந்திய மதிப்பில் 595 ரூபாய். ஆச்சரியமாக இருக்கிறதா? இந்த செய்திதான் இன்று இணையத்தில் வைரல். எலான் மஸ்க் வரை இந்த செயலுக்கு ரியாக்ட் செய்துள்ளனர்.

அமெரிக்கா வாழ் இந்தியர் மனீஷ் சேதி, பாவ்லோக் என்ற நிறுவனத்தை அமெரிக்காவில் நடத்தி வருகிறார். அண்மையில் இவர், காரா என்ற இளம்பெண்ணை வேலைக்கு அமர்த்தி இருக்கிறார். பலருக்கும் ஆச்சரியம் தரும் இந்த வேலைக்கு, ஒரு மணி நேரத்திற்கு சுமார் 595 ரூபாய் சம்பளமாகத் தருகிறார். மனீஷ் சேதி எப்போதெல்லாம் பேஸ்புக் பக்கத்திற்கு நுழைகிறாரோ, அப்போதெல்லாம் காரா கன்னத்தில் பளார் என்று ஒரு அரை விடுவார்.

பேஸ்புக்கில் வீணாக பொழுது போக்குவதைத் தவிர்த்தால் வேலையில் கூடுதலாக கவனம் செலுத்த முடியும் என்பதற்காகவே, மனீஷ் சேதி இப்படி வேலைக்கு ஆள் எடுத்துள்ளார். உண்மையில் காராவை வேலைக்கு அமர்த்திய பின்னர் உற்பத்தித் திறன் 40 சதவீதத்திலிருந்து இருந்து 98 சதவீதம் வரை அதிகரித்து இருப்பதாக மனீஷ் கூறுகிறார். இந்த வேலை குறித்த செய்திகள் இணையத்தில் வைரலாகி உள்ளது. இதனை பகிர்ந்துள்ள ஸ்பேஸ் எக்ஸ் நிறுவனர் எலான் மஸ்க், இரண்டு ‘தீ’  ஸ்மைலியை ட்விட்டரில் பகிர்ந்துள்ளார்.

எலான் மஸ்க் ரிப்ளை தனக்கு மகிழ்ச்சி அளிப்பதாக மனீஷ் சேஷி தெரிவித்துள்ளார். அதே சமயம் மனீஷ் சேதிக்கு கன்னத்தில் அறை வாங்குவது ஒன்றும் புதிதல்ல, ஓய்வு நேரத்தில் யாரையாவது கத்த சொல்வதும், கன்னத்தில் அரைய சொல்வதுமே பொழுது போக்காக வைத்துள்ளார்.