’அதானிக்கு கடன் வழங்காதே’ – கிரிக்கெட் மைதானத்தில் குதித்த ஆஸ்திரேலியர்கள்

இந்தியா – ஆஸ்திரேலியாவுக்கு எதிரான கிரிக்கெட் போட்டியின் போது மைதானத்திற்குள் நுழைந்த போராட்டக்காரர்கள் அதானி குழுமத்தின் நிலக்கரி சுரங்கம் குறித்தான தங்கள் எதிர்ப்பை பதிவு செய்தனர்.

இந்தியா – ஆஸ்திரேலியாவுக்கு எதிரான முதல் ஒருநாள் கிரிக்கெட் போட்டி இன்று சிட்னியில் நடைபெற்று வருகிறது. டாஸ் வென்ற ஆஸ்திரேலியா அணி முதல் பேட்டிங்  விளையாடி வந்தது. அப்போது, திடீரென போட்டியின் 7-வது ஓவரில் இரு ஆஸ்திரேலியர்கள்  மைதானத்திற்குள் நுழைந்து, அவர்களது கைகளில் ‘1 பில்லியன் டாலரை அதானிக்கு கொடுக்காதே’ என்ற வாசகமுள்ள பதாகையை ஏந்தி நின்றனர். இதனால் மைதானத்தில் சிறிது நேரம் பதட்டம் நிலவியது. மைதானத்தின் பாதுகாவலர்கள் அவர்களை அப்புறபடுத்திய பின் போட்டி மீண்டும் தொடங்கியது.

ஆஸ்திரேலியாவின் குயின்ஸ்லாந்து பகுதியில் நிலக்கரி சுரங்கம் அமைக்க அதானி குழுமத்திற்கு அனுமதி கிடைத்தது.  மேலும்,  இத்திட்டத்திற்காக 1 பில்லியன் டாலரை ஸ்டேட் வங்கி அதானி குழுமத்திற்கு வழங்க உள்ளது. இதனை எதிர்த்து ஆஸ்திரேலியாவில் போராட்டங்கள் நடந்து வந்த நிலையில், சர்வேதச மக்களின் கவனத்தை ஈர்க்கும் பொருட்டு போராட்டக்காரர்கள் தங்கள் எதிர்ப்பை இவ்வாறு பதிவு செய்துள்ளனர்.