வேளாண் சட்டங்களுக்கு எதிராக விவசாயிகள் டிராக்டர் பேரணி!

வேளாண் சட்டங்களுக்கு எதிராக போராடி வரும் விவசாயிகள் அடுத்தக்கட்ட நடவடிக்கையாக டிராக்டர் பேரணியை தொடங்கியுள்ளனர்.

மத்திய அரசு கொண்டு வந்துள்ள வேளாண் சட்டங்களுக்கு எதிராக 40 நாட்களுக்கும் மேலாக, தலைநகர் டெல்லியில் விவசாயிகள் போராட்டத்தில் ஈடுபட்டு வருகின்றனர். இதுகுறித்து, விவசாயிகளுடன் மத்திய அரசு இதுவரை நடத்திய ஏழு சுற்று பேச்சுவார்த்தையிலும் உடன்பாடு ஏற்படவில்லை.

இந்நிலையில் நாளை, (வெள்ளிக்கிழமை) மீண்டும் விவசாயிகளை பேச்சுவார்த்தைக்கு வருமாறு அழைத்துள்ளது ஆனால், விவசாயிகள் வேளாண் சட்டத்தை ரத்து செய்வதில் உறுதியாக உள்ளனர். இதனையடுத்து காசியாப்பூரில் இருந்து நொய்டா வரை செல்லும் டிராக்டர் பேரணியை விவசாயிகள் இன்று தொடங்கினர்.

வேளாண் சட்டங்களை திரும்பப் பெறாவிடில், குடியரசு தினத்தன்று டிராக்டர்களைக் கொண்டு முற்றுகை போராட்டம் நடத்துவோம் எனவும் விவசாயிகள் எச்சரிக்கை விடுத்துள்ளனர்.