மசூதிகள் கட்டுவதற்கு 36,000 இந்துக் கோயில்கள் இடிப்பு – பாஜக எம்.எல்.ஏ சர்ச்சை பேச்சு!

மசூதிகள் கட்டுவதற்காக 36,000 இந்துக் கோயில்கள் இடிக்கப்பட்டிருப்பதாகவும், அதை இந்துக்கள் சட்டப்பூர்வமாக மீட்பார்கள் எனவும் கர்நாடக பாஜக எம்.எல்.ஏ கே.எஸ். ஈஸ்வரப்பா சர்ச்சைக்குரிய வகையில் கருத்துத் தெரிவித்துள்ளார்.
 

கர்நாடக மாநிலத்தின் முன்னாள் துணை முதலமைச்சர் கே.எஸ்.ஈஸ்வரப்பா சர்ச்சைக்குரிய வகையில் கருத்து தெரிவிப்பதில் வல்லவர். கடந்த சில தினங்களுக்கு முன்பாக, “ ஒருநாள் இந்தியாவின் தேசியக் கொடியாகக் காவிக்கொடி இருக்கும். செங்கோட்டையில் காவிக் கொடி ஏற்றப்படும் நாள் வரும்” என கூறி பெரும் சர்ச்சையை ஏற்படுத்தினார்.
 

இந்நிலையில், மீண்டும் ஓர் கருத்தைக் கூறி சர்ச்சையை ஏற்படுத்தியுள்ளார். 36,000 இந்து கோயில்கள் இடிக்கப்பட்டு மசூதிகள் கட்டப்பட்டிருப்பதாகவும், அதை இந்துக்கள் சட்டப்பூர்வமாக மீட்பார்கள் என்றும் தெரிவித்துள்ளார்.

மேலும், அவர்கள் வேறு இடத்தில் மசூதி கட்டி வழிபடட்டும், எங்கள் கோயில்கள் மீது கட்ட அனுமதிக்க மாட்டோம் என்றும் தெரிவித்துள்ளார்.

கடந்த மே 21ஆம் தேதி மங்களூரில் உள்ள மசூதியின் அடிப்பகுதியில் இந்து கோவில் கட்டுமானங்கள் இருப்பது தெரிய வந்த நிலையில், கே.எஸ்.ஈஸ்வரப்பா இதுபோன்ற சர்ச்சைக்குரிய கருத்துகளைத் தெரிவித்து வருவது குறிப்பிடத்தக்கது.