சர்ச்சைப் பேச்சு: விளக்கம் அளித்துள்ள லியோனி!

“ஒரு வார்த்தையை எடுத்து, நமது கைகளை வைத்தே, நமது கண்களை குருடாக்கும் பாஜகவின் மலிவான அரசியலை நம் மக்கள் புரிந்து கொள்வார்கள்.” என  சர்ச்சைப் பேச்சு குறித்து திண்டுக்கல் லியோனி விளக்கம் அளித்துள்ளார்

 
திருவள்ளூர் மாவட்டம் பொன்னேரியில் திமுக அரசின் ஓராண்டு சாதனை விளக்க பொதுக்கூட்டம், கடந்த இரண்டு நாட்களுக்கு முன்பாக நடைபெற்றது. இந்த நிகழ்ச்சியில் கலந்து கொண்டு பேசிய  தமிழ்நாடு பாடநூல் கல்வியியல் பணிகள் கழக தலைவர்  திண்டுக்கல் லியோனி, “செருப்பைத் தலையில்  தூக்கிக் கொண்டு இருந்த  சமுதாயத்தை மேயராக்கி வணக்கத்திற்குரிய மாண்புமிகு மேயர் அவர்களே என அழைக்க வைத்து  திராவிட புரட்சியை செய்த தலைவர் தமிழக முதல்வர் ஸ்டாலின்” என்று பேசியது பெரும் சர்ச்சையை ஏற்படுத்தியது.

 
இதனைத் தொடர்ந்து, இன்று பாஜகவின் பட்டியலின அணியின் மாநில பொதுச் செயலாளர் நாகராஜ் சென்னை காவல் ஆணையர் அலுவலகத்தில் திண்டுக்கல் லியோனி மீது புகார் ஒன்றை கொடுத்தார்.

 
இந்நிலையில், லியோனி தனது ட்விட்டர் பக்கத்தில் விளக்கம் அளித்துள்ளளார். அதில்,  “முன்பு செருப்பை கையிலும் தலையிலும் சுமக்க வைத்து கொடுமைப் படுத்திய ஆதித்த சமுதாயத்திடமிருந்து விடுதலை பெற வைத்து இன்று பெரும் பொறுப்புகளைப் பெற வைத்த திராவிட இயக்கமும், தலைவர் மு.க.ஸ்டாலின் -இன் திராவிட மாடல் ஆட்சியில்தான் என்ற பொருளில் சொல்லப்பட்டது ஒழிய; எந்த சமுதாயத்தையும் புண்படுத்தும் நோக்கமல்ல.

 
ஒரு வார்த்தையை எடுத்து, நமது கைகளை வைத்தே, நமது கண்களை குருடாக்கும் பாஜகவின் மலிவான அரசியலை நம் மக்கள் புரிந்து கொள்வார்கள்.” என்று விளக்கம் அளித்துள்ளார்.