தமிழ்நாட்டில் தமிழ் கற்கக் கூடாதா? – உயர்நீதிமன்ற நீதிபதிகள் கேள்வி

கேந்திரிய வித்யாலயா பள்ளிகளில் தமிழ்மொழி கற்பிக்கப்பட வேண்டும் என்று கோரப்பட்ட வழக்கில், தமிழ்நாட்டில் தமிழ் மொழியைக் கற்கக் கூடாதா என உயர்நீதிமன்ற நீதிபதிகள் கேள்வி எழுப்பியுள்ளனர்.

மதுரையைச் சேர்ந்த பொன்குமார், தமிழகம் முழுவதும் செயல்பட்டு வரும் கேந்திரிய வித்யாலயா பள்ளிகளில் 1ஆம் வகுப்பு முதல் 12-ஆம் வகுப்பு வரை அனைத்து மாணவர்களுக்கும் தமிழ் மொழியை கட்டாய கல்வி மொழியாக்க வேண்டும் என வழக்கு தொடர்ந்திருந்தார்.

இந்த வழக்கு, நீதிபதிகள் கிருபாகரன், புகழேந்தி அமர்வில் விசாரணைக்கு வந்தது. அப்போது மத்திய அரசின் சார்பில் ஆஜரான வழக்கறிஞர், ’கேந்திரிய வித்யாலயா பள்ளிகள் மத்திய அரசு ஊழியர்களுக்காக தொடங்கப்பட்டது. இங்கு படிக்கும் மாணவர்கள் 50% சதவீதத்தினர் வெளி மாநிலத்தைச் சேர்ந்தவர்கள். மேலும், தமிழ் மொழி விருப்பப்பாடமாக உள்ளது’ என பதிலளித்தார்.

அதற்கு நீதிபதிகள், ‘ பிரெஞ்சு, ஜெர்மன், பெங்காலி உள்ளிட்ட மொழிகளை கற்கலாம். ஆனால், தமிழ்நாட்டில் தமிழ் கற்கக்கூடாதா?. பிரதமர் தாய்மொழியை ஊக்கப்படுத்த வேண்டும் என கூறுகிறார். ஆனால், இந்தி மற்றும் ஆங்கிலத்தை மட்டுமே படிக்க வேண்டும் என கட்டாயப்படுத்தப்படுகிறது. இப்படியே சென்றால் வருங்காலங்களில் தமிழ்மொழி தெரிந்திருந்தால் கேந்திரிய வித்யாலயாவில் இடம் கிடைக்காது என்ற நிலை ஏற்பட வாய்ப்புள்ளது. எனவே, கேந்திரிய வித்யாலயா பள்ளிகளில் விருப்பப்பாடமாக தமிழ் உள்ளது என்பதை ஏற்க முடியாது. ’ என கருத்து தெரிவித்துள்ளனர்.

மேலும், இது தொடர்பில் விரிவான உத்தரவிற்காக வழக்கு விசாரனையை நாளை ஒத்தி வைத்து உத்தரவிட்டுள்ளனர்.