மாவீரர்கள் நாள்: நினைவுச் சின்னங்கள் உடைப்பு; பத்திரிகையாளர் மீது தாக்குதல்!

இலங்கை ராணுவத்தினர் தமிழர்களின் மாவீரர் நாள் நினைவுச் சின்னங்களைத் தகர்த்துள்ளதோடு, பத்திரிகையாளர் விஸ்வலிங்கம் விஸ்வச்சந்திரனையும் கொடூரமாகத் தாக்கியுள்ளனர்.

தனிநாடு கோரி போராடிய தமிழீழ விடுதலைப் புலிகள் இயக்கத்தினரால் 1989-ஆம் ஆண்டு முதல் மாவீரர் நாள் கடைப்பிடிக்கப்படுகிறது. தனிநாடு கோரும் யுத்தத்தில் உயிர் நீத்த வீரர்களை நினைவு கூரும் வகையில் இந்நிகழ்வுகள் நடத்தப்பட்டு வருகின்றன.

 2009ஆம் ஆண்டு இலங்கை அரசுக்கும் விடுதலைப் புலிகளுக்கும் இடையே நடந்த இறுதிப் போரில் 40ஆயிரம் தமிழர்கள் கொல்லப்பட்டதாக ஐநா மனித உரிமை ஆணையம் குற்றம் சாட்டியது.

இருப்பினும், இலங்கை உட்பட உலக நாடுகளின் பல பகுதிகளிலும் மாவீரர் நாள் ஆண்டுதோறும் நவம்பர் 27-ஆம் தேதி கடைப்பிடிக்கப்படுகிறது.
 

அந்தவகையில், இலங்கையின் வடக்கு, கிழக்குப் பகுதிகளில் கடந்த நவம்பர் 27-ஆம் தேதி மாவீரர் நாள் கடைப்பிடிக்கப்பட்டது. இந்த நிகழ்வுகளை முடக்கும் வகையில் இலங்கை ராணுவமும் போலீசாரும் தமிழர்கள் மீது பல்வேறு கெடுபிடிகளைப் பிரயோகித்துள்ளனர். அதேபோல், சில இடங்களில் மாவீரர் நினைவுச் சின்னங்களை இலங்கை ராணுவத்தினர் தகர்த்துள்ளனர்.
 

அதேபோல், முள்ளி வாய்க்கால் பகுதியில் மாவீரர் நாள் குறித்த செய்தி சேகரிக்கச் சென்ற பத்திரிகையாளர் விஸ்வலிங்கம் விஸ்வசந்திரனை  இலங்கை ராணுவத்தினர் கடுமையாகத் தாக்கி உள்ளனர். இலங்கை ராணுவத்தின் இத்தாக்குதலுக்கு பல்வேறு பத்திரிகையாளர் அமைப்புகள் கடும் கண்டனம் தெரிவித்துள்ளனர்.

 
இதனிடையே பத்திரிகையாளர் விஸ்வலிங்கம் தாக்கப்பட்டது தொடர்பாக இலங்கை மனித உரிமைகள் குழு விசாரணையைத் தொடங்கி உள்ளது. பத்திரிகையாளர் மீது தாக்குதல் நடத்திய முல்லைத் தீவு படைப் பிரிவு, முல்லைத் தீவு போலீசார் டிசம்பர் 3ஆம் தேதிக்குள் விளக்கம் அளிக்கவும் இலங்கை மனித உரிமைகள் ஆணையம் நோட்டீஸ் அனுப்பி உள்ளது.