மூத்த பத்திரிகையாளர் ப்ரியா கல்யாணராமன் மறைவு!

மூத்த பத்திரிகையாளரும் குமுதம் வார இதழின் ஆசிரியருமான ப்ரியா கல்யாணராமன் (வயது 56) மாரடைப்பு காரணமாக இன்று காலமானார்.

ராமச்சந்திரன் என இயற்பெயர் கொண்ட ப்ரியா கல்யாணராமன் நாகப்பட்டினம் மாவட்டத்தில் உள்ள சிக்கலை என்ற கிராமத்தைச் சேர்ந்தவர். இவர் குமுதம் வார இதழில் பல ஆண்டுகள் ஆசிரியராக பணியாற்றியவர். குமுதம் வார இதழில் 21 வயதிலேயே பத்திரிகையாளராக வாழ்க்கையைத் தொடங்கினார். குமுதம் நிறுவனர் எஸ்.ஏ.பி.யால் பத்திரிகை உலகத்துக்கு அடையாளம் காட்டப்பட்டவர் ப்ரியா கல்யாணராமன்.

அவருடைய மனைவி ராஜ சியாமளாவும் ஒரு எழுத்தாளர். ப்ரியா கல்யாணராமனுக்கு ஒரு மகனும் ஒரு மகளும் உள்ளனர்.

நூற்றுக்கும் மேற்பட்ட சிறுகதைகளையும், ஏராளமான நாவல்களையும் எழுதியுள்ளார் ப்ரியா கல்யாணராமன். குமுதத்தில் பல தொடர்களை நீண்டகாலம் எழுதியவர். ஆன்மீக துறையில் பல நூல்களை எழுதியிருக்கிறார்.

தமிழகத்தின் பல்வேறு ஊர்களில் உள்ள கோவில்களுக்கு நேரில் சென்று அதன் சிறப்புகளை எழுதிய ஒருசிலரில் இவரும் ஒருவர்.

கடந்த 30 ஆண்டுகளாகப் பத்திரிகைத் துறையில் தனக்கென தனி முத்திரை பதித்த ப்ரியா கல்யாணராமன் சென்னையில் இன்று மாரடைப்பால் காலமானார். ப்ரியா கல்யாணராமன் மறைவுக்கு அரசியல் தலைவர்கள், ஆன்மீக பிரமுகர்கள் மற்றும் பத்திரிகையாளர்கள்  இரங்கல் தெரிவித்து வருகின்றனர்.