புது நாவல் வரிசை: 8 - ‘ஒரு பாடகி ஒரு மாயப்பிறவி’

தமிழ் படைப்புலகிற்குள் நன்கு அறிமுகமானவர் எழுத்தாளர் சுரேஷ்குமார இந்திரஜித். காலச்சுவடு வெளியீடாக வந்திருக்கும் ‘ஒரு பாடகி ஒரு மாயப்பிறவி’ இவரின் புதிய நாவலாகும்.

வித்தியாசமான தலைப்புடன் வெளிவந்திருக்கும் நாவலின் கதைக்களம் பற்றி சுரேஷ்குமார இந்திரஜித்திடம் கேட்டோம்.

‘ஒரு பாடகி ஒரு மாயப்பிறவி’ ஒரு நவீன கதை. கர்நாடக இசைப் பாடகி ஒருவளின் கதையும், மாயப்பிறவி ஒருவனின் கதையுமே இந்த நாவல். இந்த இரண்டு கதைகளும் நாவலில் இணையாக செல்லும்.

மறைதலை (Disappearance) அடிப்படையாகக் கொண்டுதான் இந்த எழுதியிருக்கிறேன். அது தான் நாவலின் மையம்.

நம்முடைய வரலாற்றிலும் சில பேர் மறைந்து போயிருக்கின்றனர். மராட்டிய மன்னரான நானா சாகிப், மகாபாரதத்தில் வரும் அஸ்வத்தாமன், தமிழகத்தைச் சேர்ந்த துறவியான  பட்டினத்தார், வடலூரைச் சேர்ந்த வள்ளலார் ஆகியோர் மறைந்து போய் இருக்கின்றனர்.

நாவலின் வரும் நந்தினியின் கணவன் காணாமல் போய்விடுகிறான். அதன் பிறகு, நந்தினிக்கும் சபா உறுப்பினரான ஆனந்தனுக்கும் காதல் ஏற்படும். ஆனால், ஏற்கனவே ஆனந்தனுக்கு திருமணம் ஆகியிருக்கும்.

ஒருகட்டத்தில் ஆனந்தனும் - நந்தினியும் திருமணம் செய்து கொள்ள முடிவுசெய்கிறார்கள். ஆனந்தன் தன்னுடைய மனைவியிடமிருந்து விவாகரத்து வாங்குகிறான். நந்தினி தன்னுடைய கணவன் இறந்துபோனதற்கான சான்றிதழை சட்டப்படி வாங்குகிறாள்.

நந்தினியின் பாடல் திறனைப் பிரபலப்படுத்த ஆனந்தன் நிறைய மேடை அரங்கேற்றங்களுக்கு ஏற்பாடு செய்கிறான்.

ஒருநாள், அவர்கள் இருக்கும் பக்கத்து ஊர் கோவிலுக்கு சாமியார் ஒருவர் வந்திருப்பதாகக் கேள்விப்பட்டு, இருவரும் கோவிலுக்கு சென்று சாமியாரிடம் ஆசீர்வாதம் பெறுகிறார்கள். அந்த சாமியார் காணாமல் போன தன்னுடைய கணவன் மாதிரி இருப்பதாக நந்தினி நினைத்துக்கொள்கிறாள்.

அடுத்த நாள் நந்தினிக்கு மனப்பிறழ்வு ஏற்படுகிறது. அவளுடைய கணவன் தான் நந்தினியின் உடலுக்குள் இறங்கிவிட்டதாக மற்றவர்கள் நினைத்துக் கொள்கிறார்கள். பிறகு நந்தினியை மனநல மருத்துவமனைக்கு அழைத்துச் செல்கிறார்கள். இத்துடன் இந்த கதை முடிவடைகிறது.

மற்றொரு கதையில் வரும் மாயப்பிறவி, வெவ்வேறு ரூபம் எடுத்து, வெவ்வேறு ஊர்களில், வெவ்வேறு மனிதர்களிடம்  கதைகளைச் சொல்லிக் கொண்டிருப்பான். பாரிஸில் அஸ்வத்தாமன் கதையையும், கான்பூரில் நானா சாகிப்பின் கதையையும், வடலூரில் வள்ளலாரின் கதையையும் சொல்லிக் கொண்டிருப்பான்.

தான் யார் என்று தெரியாமல், ஒரு குழப்பமான மனநிலையில் இருக்கும் மாயப்பிறவி கடலுக்குள் குதித்து மறைந்து போவான்.

நந்தினி மருத்துவமனைக்குச் செல்வதுடனும், மாயப்பிறவி கடலுக்குள் குதிப்பதுடனும் நாவல் நிறைவடைகிறது.

மாயப்பிறவி தான் நந்தினியின் கணவனா? நந்தினிக்கும் ஆனந்தனுக்கும் திருமணம் நடந்ததா? இல்லையா? என்பது வாசகர்களின் கற்பனைக்கு விட்டிருக்கிறது.

போர்ஹே, ஒரு கதைக்குத் தொடக்கமும் இல்லை, முடிவும் இல்லை என்பார். அதுபோலத்தான் ‘ஒரு பாடகி ஒரு மாயப்பிறவி’ நாவலும் . இந்த நாவலுக்கு தொடக்கம் உள்ளது. ஆனால், முடிவு புதிராக உள்ளது” என்றார் சுரேஷ்குமார இந்திரஜித்.

நாவல்: ‘ஒரு பாடகி ஒரு மாயப்பிறவி’
ஆசிரியர்: சுரேஷ்குமார இந்திரஜித்
பதிப்பகம்: காலச்சுவடு
விலை: ரூ.150

தா.பிரகாஷ்