சல்மான்கானுக்கு கொலை மிரட்டல்: பாதுகாப்பை அதிகரித்த மகாராஷ்டிரா அரசு!

சித்து மூஸ்வாலாவைப் போல கொல்லப்படுவீர்கள் என்று பாலிவுட் நடிகர் சல்மான் கான் மற்றும் அவரது தந்தை சலீம் கானிற்கு மிரட்டல் கடிதம் வந்ததைத் தொடர்ந்து அவர்களுக்கான போலீஸ் பாதுகாப்பை பலப்படுத்தியுள்ளது மகாராஷ்டிரா அரசு.

 
மும்பையின் பாந்த்ரா பேண்ட்ஸ்டாண்ட் பகுதியில் நடிகர் சல்மான் கானின் தந்தை சலீம் கான் நேற்று காலை நடைப்பயிற்சி மேற்கொண்டிருந்தார்.

 
சலீம் கான் வழக்கமான நடைபயணத்திற்கு பிறகு பூங்காவில் ஒரு பெஞ்சில் அமர்ந்துள்ளார். அப்போது அங்கிருந்த கடிதத்தில் சலீம் கான், சல்மான் கான் இருவரும் சித்து மூஸ்வாலாவை போல கொல்லப்படுவீர்கள் என்று எழுதப்பட்டிருப்பதைக் கண்டு அவர் அதிர்ச்சியடைந்தார்.

 
அதைத்தொடர்ந்து காவல்துறையிடம் சலீம் கான் புகாரளித்துள்ளார். இதனைத் தொடர்ந்து மகாராஷ்டிரா அரசு அவர்கள் இருக்கும் பாதுகாப்பை பலப்படுத்தியுள்ளது.

 
மேலும், பஞ்சாப் பாடகரும் காங்கிரஸ் கட்சியை சேர்ந்தவருமான சித்து மூஸ்வாலா கடந்த மாதம் சுட்டுக்கொல்லப்பட்டார். மன்சா மாவட்டத்தில் மர்ம நபர் நடத்திய துப்பாக்கியால் சுட்டதில் சித்து மூஸ்வாலா உயிரிழந்தார் என்பது குறிப்பிடத்தக்கது.