பாடலாசிரியர் சினேகன் மீதான வழக்கில் இறுதி அறிக்கை தாக்கல் செய்ய நீதிமன்றம் தடை!

நடிகை ஜெயலட்சுமி அளித்த புகாரில் பாடலாசிரியர் சினேகன் மீது தொடரப்பட்ட வழக்கில் இறுதி அறிக்கை தாக்கல் செய்ய காவல் துறைக்குத் தடை விதித்து சென்னை உயர்நீதிமன்றம் உத்தரவிட்டுள்ளது.

பாடலாசிரியர் சினேகன் ‘சினேகம்’என்ற பெயரில் அறக்கட்டளை நடத்தி வருகிறார். இந்த அறக்கட்டளையின் பெயரைப் பயன்படுத்தி, பொதுமக்களிடம் பணம் வசூலித்து ஜெயலட்சுமி மோசடி செய்ததாகக் கடந்த ஆகஸ்ட் மாதம் சென்னை மாநகர காவல் ஆணையரகத்தில் சினேகன் புகார் அளித்தார்.

அதன் அடிப்படையில் ஜெயலட்சுமி மீது காவல் துறையினர் வழக்குப் பதிவு செய்தனர். தம் மீது சினேகன் தவறான குற்றச்சாட்டுகளைச் சுமத்தி புகார் அளித்து தமது பெயருக்குக் களங்கம் ஏற்படுத்தியாகக் கூறி சினேகன் மீது ஜெயலட்சுமி புகாரளித்தார். அதன்பேரில், சினேகன் மீது வழக்குப் பதிவு செய்யப்பட்டது.
 

தன் மீதான வழக்கை ரத்து செய்யக் கோரி சென்னை உயர்நீதிமன்றத்தில் சினேகன் தாக்கல் செய்த மனு நீதிபதி வி.சிவஞானம் முன்பு விசாரணைக்கு வந்தது.

இந்த வழக்கை விசாரித்த நீதிபதி, சினேகன் மீதான வழக்கில் இறுதி அறிக்கை தாக்கல் செய்ய காவல் துறைக்குத் தடை விதித்து, விசாரணையை ஒத்திவைத்தார்.