ஆசியப் பணக்காரர்கள் பட்டியல்- அம்பானி முதலிடம்!

அமெரிக்காவை சேர்ந்த ’போர்ப்ஸ்’ பத்திரிக்கை, உலக கோடீசுவரர்கள் பட்டியலை வெளியிட்டுள்ளது.

 
பெரும்  பணக்காரர்கள் உள்ள  நாடுகளின் பட்டியலில் அமெரிக்கா முதலிடத்திலும், சீனா இரண்டாவது  இடத்திலும், இந்தியா மூன்றாவது இடத்தையும் பெற்றிருக்கிறது. இதில் கவனிக்கப்பட வேண்டிய விஷயம் என்னவெனில்,  ரிலையன்ஸ் இண்டஸ்ட்ரீஸ் தலைவரான  முகேஷ் அம்பானி, ஆசியாவின் நம்பர் 1 பணக்காரர் என்ற பெயரை மீண்டும் கைப்பற்றியிருக்கிறார் என்பதுதான். ஓராண்டுக்கு முன்பு அந்த அந்தஸ்தை சீனாவைச் சேர்ந்த ஜாக் மா பெற்றிருந்தார்.

 
அம்பானியின் சொத்து மதிப்பு 8 ஆயிரத்து 450 கோடி டாலர் ஆகும். உலக பணக்காரர்கள் பட்டியலில் அம்பானி பத்தாவது இடத்தில் உள்ளார்.உலகப் பெரும் பணக்காரராக அமேசான் நிறுவனத்தின் ஜெப் பெசோஸ், தொடர்ந்து நான்கு ஆண்டுகளாகத்  தேர்வுசெய்யப்பட்டுள்ளார். அவருடைய சொத்து மதிப்பு, 17 ஆயிரத்து 700 கோடி டாலராகும். ஸ்பேஸ்எக்ஸ் நிறுவனர் எலான் மஸ்க் 15 ஆயிரத்து 100 கோடி டாலருடன் இரண்டாவது இடத்தில் உள்ளார்.